Tramp pen Mask arasyndaǵy saıası janjal qaıta ýshyqty

ASTANA. KAZINFORM – AQSh prezıdenti Donald Tramp pen onyń burynǵy odaqtasy, Tesla kompanııasynyń bas dırektory Ilon Mask arasyndaǵy shıelenis qaıtadan órshidi, dep jazdy Kazinform agenttiginiń menshikti tilshisi.

Buǵan sebep — eldegi bıýdjettik shyǵyndar týraly zań jobasynyń qabyldanýy. Osyǵan baılanysty AQSh prezıdenti Maskqa memlekettik sýbsıdııalardy alyp tastap, ony Ońtústik Afrıkaǵa «qaıtarýǵa» qoqan-loqqy jasady. 

The New York Times basylymynyń málimetinshe, mıllıarder ári Tramptyń burynǵy keńesshisi Mask eger bul ishki saıasatqa qatysty zań jobasy qabyldanatyn bolsa, ózi “Amerıka partııasyn” quryp, Kongresstegi respýblıkashyldardyń kóbine qarsy shyǵatyn kandıdattardy qoldaıtynyn málimdedi.

– Eger bul essiz shyǵyndar týraly zań jobasy qabyldansa, kelesi kúni-aq «Amerıka partııasy» qurylady. Bizdiń elimizge demokrattar men respýblıkashylardan turatyn bir partııaly júıege balama qajet. Adamdardyń shyn máninde daýysy bolý kerek, – dep jazdy Ilon Mask áleýmettik jelide.

Mask naqty áreketke kóshemin dep ýáde berip, zań jobasyna qarsy shyqqan belgili saıasatker Kentýkkı shtatynan ókil Tomas Messıdi qoldaıtynyn málimdedi.

Óz kezeginde Donald Tramp Masktyń SpaceX sııaqty kompanııalary alyp otyrǵan federaldyq sýbsıdııalardan aıyrý qaýpin tóndirdi:

– Ilon tarıhtaǵy kez kelgen adamnan artyq sýbsıdııa alǵan bolýy múmkin. Eger bul sýbsıdııalar bolmasa, oǵan dúkenin jaýyp, Ońtústik Afrıkaǵa oralýǵa týra keler edi. Eshqandaı zymyran, spýtnık, ne elektromobıl óndirisi qalmaıdy. El qazynasy da orasan zor qarajatty únemder edi, – dep jazdy Tramp áleýmettik jelilerde.

Tramp memlekettik basqarý tıimdiligi departamentine SpaceX pen Tesla sııaqty kompanııalarǵa beriletin sýbsıdııalardy muqııat tekserýdi tapsyrdy.

Buǵan deıin Aq úıdegi Tramptyń burynǵy aǵa keńesshisi Stıv Bennon Maskpen arada týyndaǵan janjaldan keıin oǵan qatysty tergeý júrgizýdi jáne barlyq memlekettik kelisimsharttardy joıýdy talap etken bolatyn.

Ilon Mask Tramptan keshirim surady.