Tramp pen Lı ne týraly kelisti: sýasty qaıyqtaryna arnalǵan otyn jáne 350 mlrd dollarlyq ınvestıtsııa
ASTANA. KAZINFORM – Ońtústik Koreıa Prezıdenti Lı Chje Men AQSh Prezıdenti Donald Tramptan atomdyq sýasty qaıyqtaryna arnalǵan otyn alýǵa ruqsat berýdi surap, eldiń qorǵanys áleýetin arttyrý maqsatynda qorǵanys bıýdjetin ulǵaıtatynyn málimdedi, dep habarlaıdy Yonhap News Agency.
Mundaı málimdeme Lı men Tramptyń ońtústikkoreıalyq Kendjý qalasynda ótken ekijaqty sammıti kezinde jasaldy. Seýl ıadrolyq energetıka salasyndaǵy ekijaqty kelisimdi qaıta qaraýǵa nıetti. Bul elge paıdalanylǵan ıadrolyq otyndy qaıta óńdeý jáne ýran baıytý máselelerinde kóbirek erkindik beredi.
– Siz atomdyq sýasty qaıyqtaryna arnalǵan otyn jetkizýge múmkindik beretin sheshim qabyldaısyz dep úmittenemin, – dedi Lı Tramptan ıadrolyq otyndy qaıta óńdeý jónindegi konsýltatsııalardy jedeldetýdi tapsyrma retinde berýdi surap.
Onyń aıtýynsha, dızeldi qozǵaltqyshpen júretin sýasty qaıyqtardyń súńgý múmkindigi shekteýli, bul Ońtústik Koreıa áskeriniń Soltústik Koreıa men Qytaıdyń sýasty kemelerin baqylaý qabiletin tómendetedi. Sonymen qatar ol bul ótinishtiń ıadrolyq qarýmen jabdyqtalǵan atomdyq sýasty qaıyqtar salýǵa baǵyttalmaǵanyn erekshe atap ótti.
– Eger otyn jetkizýge ruqsat berilse, biz óz tehnologııamyzdy paıdalana otyryp, ádettegi qarýmen jabdyqtalǵan birneshe sýasty qaıyq sala alamyz. Bul Koreıa túbegi mańyndaǵy sýlardy qorǵaýǵa jáne AQSh qarýly kúshteriniń júktemesin azaıtýǵa múmkindik beredi, – dedi Lı Chje Men.
Prezıdent sondaı-aq ýran baıytý jáne paıdalanylǵan ıadrolyq otyndy qaıta óńdeýdi retteıtin ekijaqty ıadrolyq kelisimdi qaıta qaraý jónindegi kelissózderdi jedeldetýdi surady.
Qazirgi ýaqytta Ońtústik Koreıaǵa ýrandy 20 paıyzdan tómen deńgeıde ǵana AQSh kelisimimen baıytýǵa ruqsat etilgen, al otyndy qaıta óńdeýge tolyq tyıym salynǵan.
Lı Chje Men eki el arasyndaǵy odaqtastyqty jańǵyrtyp, ony «bolashaqqa baǵyttalǵan jan-jaqty strategııalyq alıansqa» aınaldyrýǵa nıetti ekenin aıtty. Ol óz úkimetiniń qorǵanys shyǵyndaryn arttyrý arqyly eldiń ózin-ózi qorǵaý qabiletin kúsheıtýge baǵyttalǵan sharalar qabyldaıtynyn atap ótti.
– Koreıa Respýblıkasy qorǵanys salasyna shyǵyndardy kóbeıtip, áskerı ónerkásipti damyta otyryp, óz qorǵanys áleýetin aıtarlyqtaı arttyrady. Bul óz kezeginde AQSh-tyń qorǵanys shyǵyndaryn azaıtýǵa múmkindik beredi, – dedi Lı.
Sonymen qatar ol Ońtústik Koreıanyń AQSh-taǵy óndiris pen ınvestıtsııany keńeıtýge baǵyttalǵan Tramptyń bastamalaryn qoldaıtynyn rastady.
– Biz keme jasaý salasyndaǵy yntymaqtastyqty belsendi damytamyz. Bul eki el ekonomıkasyna da paıda ákelip, odaqtastyqty neǵurlym praktıkalyq ári turaqty etedi, – dep atap ótti ol.
CNBC dereginshe, kelissózder qorytyndysy boıynsha Tramp pen Lı 350 mlrd dollarlyq ınvestıtsııalyq qor jóninde ýaǵdalasty. Sonyń ishinde 200 mlrd dollar qolma-qol qarajat túrinde bólinip, jylyna 20 mlrd dollardan artyq emes mólsherde kezeń-kezeńimen tólenedi. Qalǵan 150 mlrd dollar Tramp ýáde etken AQSh-taǵy keme jasaý salasyn qalpyna keltirýge baǵyttalady.
Ońtústikkoreıalyq taraptyń habarlaýynsha, taraptar bastapqy ınvestıtsııalar ótelgenge deıin tabysty teń úlespen bólýge jáne tek ekonomıkalyq turǵydan tıimdi jobalardy damytýǵa ýaǵdalasty.
Buǵan deıin Ońtústik Koreıa Donald Trampqa ejelgi altyn tájdiń kóshirmesin tabys etti.