Tramp pen Kım «konstrýktıvti dıalogty» jalǵastyrýǵa kelisti
ASTANA. QazAqparat - AQSh prezıdenti Donald Tramp pen Soltústik Koreıa kóshbasshysy Kım Chen Yn Vetnamdaǵy ekinshi sammıt aıasynda kóterilgen máselelerdi sheshý maqsatynda «konstrýktıvti dıalogty» jalǵastyrýǵa kelisti, dep habarlaıdy «QazAqparat» HAA tilshisi Phenıannyń aqparat agenttigine silteme jasap.
Yonhap agenttiginiń habarlaýynsha, Hanoıdaǵy kelissózder Tramp jáne Kımniń jazbasha kelisimine qol qoıýsyz aıaqtalǵan soń, erteńine osyndaı aqparat taratylǵan.
«Taraptar Koreı túbegin ıadro qarýynan bosatý jáne KHDR jáne AQSh arasyndaǵy qarym-qatynastardy aldaǵy ýaqytta damytý, sondaı-aq Hanoıdaǵy sammıtte talqylanǵan máselelerdi retteý úshin konstrýktıvti dıalogty jalǵastyrý máselelerinde bir-birimen baılanys ornatýǵa kelisti», - delingen habarlamada.
Soltústik Koreıa basshysy Trampqa tabysty kezdesýler men kelissózderdi ótkizýge kúsh salatynyn aıtyp, «kelesi kezdesýdi ótkizýge» ýádesin bergen.
Eki kúnge sozylǵan kelissózderden keıin AQSh prezıdenti Phenıan tarapy Vashıngtonnan sanktsııalardy «tolyǵymen» joıýdy talap etkenin, bul talapty qabyldaı almaıtynyn jetkizdi.
Soltústik Koreıa bıligi artynsha bul málimdemeni joqqa shyǵaryp, sanktsııalardy ishinara jeńildetýdi, onyń esesine Ionbendegi negizgi ıadro keshenin buzatynyn usynǵanyn habarlady.
Avtory: Tatıana Kýdrenok
