Tramp óziniń Rım Papasy beınesindegi sýretin jarııalady
ASTANA. KAZINFORM – AQSh prezıdenti Donald Tramp Truth Truth Social áleýmettik jelisinde Rım Papasy beınesindegi sýretin jarııalady.
Sýrette Donald Tramptyń altyn jalatylǵan taq ústinde otyrǵany beınelengen. Ústinde aq kıimi (katolık dinbasylary kıetin etegi uzyn kıim), basynda hrıstıan shirkeý basylarynyń bas kıimi – mıtra, keýdesinde altyn krest bar. Oń qolynyń suq saýsaǵy joǵary kóterilip, saqına saýsaǵynda papa saqınasy taǵylǵan kórinedi.
Bul kadr jasandy ıntellekt arqyly shyǵarylǵan dep shamalanyp otyr. Sýretke astynda eshbir mátin jazylǵan joq.
Aq úı Tramptyń jazbasyna repost jasady. https://x.com/WhiteHouse/status/1918502592335724809
Tramp buǵan deıin jańa Rım Papasy bolǵysy keletinin ázildegen bolatyn. Bul týraly ol tilshilermen áńgimesinde aıtty. Beıneni Forbes Breaking News YouTube arnasynda jarııalady.
- Men Rım Papasy bolǵym keledi. Bul meniń birinshi tańdaýym bolar edi, - dedi Tramp.
Ol pontıfık laýazymyna yqtımal kandıdattar arasynda artyqshylyǵy joq ekenin qosyp ótti.
Eske sala ketsek, Jańa Rım Papasyn tańdaý rásimi 7 mamyrǵa belgilengenin jazǵan bolatynbyz.