Tramp óziniń qurmetine vokzal men áýejaıdyń ataýyn ózgertkisi keledi
ASTANA. KAZINFORM – Donald Tramp óziniń qurmetine AQSh-tyń eń iri vokzaly men áýejaılarynyń birin ózgertý týraly bastama kóterdi, dep habarlaıdy Kazinform agenttigi.
CNN málimetinshe, prezıdent Nıý-Iorktegi Penn-steıshn vokzaly men Vashıngton mańyndaǵy Dalles halyqaralyq áýejaıy onyń esimimen atalatyn bolsa, Gýdzon ózeniniń astynan ótetin jańa tonnel qurylysyna qarjylandyrýdy qaıta jandandyrýǵa daıyn ekenin málimdegen.
Telearnanyń habarlaýynsha, Tramp bul ıdeıany Nıý-Iork shtatynan saılanǵan Senattaǵy demokratııalyq azshylyq jetekshisi Chak Shýmermen talqylaǵan.
Qarsy qadam retinde prezıdent Nıý-Iork pen Nıý-Djersı shtattaryn baılanystyratyn tonnel salýdy kózdeıtin iri Gateway ınfraqurylymdyq jobasyn iske asyrýǵa arnalǵan shamamen 16 mlrd dollar qarjyny qaıta bosatýǵa ýáde bergen.
Alaıda Shýmer mundaı nysandardyń ataýyn ózgertý týraly sheshim qabyldaýǵa ókilettigi joq ekenin aıtqan.
Gateway jobasyn úılestiretin komıssııa buǵan deıin federaldyq qarjylandyrý bolmasa, jumys jaqyn ýaqytta toqtatylyp, myńdaǵan qurylysshy jumysynan aıyrylýy múmkin ekenin eskertken.
Tonnel qurylysy Tramptyń Aq úıge qaıta oralýyna deıin bastalǵan, al shyǵynnyń edáýir bóligi federaldyq bıýdjet esebinen jabylýy tıis bolǵan. Ótken jyldyń sońynda prezıdent jobany qarjylandyrýdy toqtatý jóninde tapsyrma bergen. Nıý-Iork pen Nıý-Djersıdegi Demokratııalyq partııa ókilderi bul sheshimdi saıası sebeptermen qabyldanǵan dep baǵalaǵan.
Sonymen qatar konservatıvti zań shyǵarýshylar toby Dalles áýejaıyn «Donald Dj. Tramp atyndaǵy halyqaralyq áýejaı» dep ataý týraly zań jobasyn usynǵanymen, bul bastama ázirge keń qoldaý tappaǵan.
Eske salaıyq, buǵan deıin Tramp jeńildikpen dári-dármek satatyn saıtqa óz atyn bergen bolatyn. Ótken jyly amerıkalyq kóshbasshy Kennedı ortalyǵyn basqarýǵa kirisip, jaqtastarynan dırektorlar keńesin quryp, mekemeni «Donald Dj. Tramp pen Djon F. Kennedı atyndaǵy oryndaýshylyq óner memorıaldyq ortalyǵy» dep qaıta ataý týraly sheshim qabyldaǵan.
Bul sheshim narazylyq tolqynyn týǵyzdy: kóptegen ártis pen ujymdar saıası qysymǵa silteme jasap, óner kórsetýden bas tartqan.
Buǵan deıin Aq úıdegi jańa bal zaly da Tramptyń esimimen atalaýy múmkin ekeni habarlanǵan.
Sondaı-aq AQSh Beıbitshilik ınstıtýtynyń da Tramptyń atymen atalǵany týraly aqparat taraǵan.
Aıta ketelik AQSh Iranmen saýda jasaıtyn elderden keletin taýarlardan baj salyǵyn alady.