Tramp óziniń áleýmettik jelisinde jumbaq jazba jarııalady

ASTANA. KAZINFORM — AQSh prezıdenti Donald Tramp Truth Social áleýmettik jelisinde óz sýretimen birge jumbaq jazýy bar jazba jarııalady.

Tramp óz paraqshasyna X áleýmettik jelisiniń Flopor atty qoldanýshysy jarııalaǵan tvıtti bólisken.

— Álem jaqynda túsinedi. Kele jatqandy eshkim toqtata almaıdy, — delingen sýret astyndaǵy jazbada.

Bul jazba Trampty qoldaýshylar men synshylar arasynda qyzý talqylaý týdyrdy.

Buǵan deıin áleýmettik jelilerde AQSh prezıdentiniń «qaıtys bolǵany» týraly qaýesetter taraǵan bolatyn. Bul qaýesetter vıtse-prezıdent Djeı Dı Venstiń málimdemesinen keıin paıda boldy. Ol Trampqa birdeńe bola qalsa, AQSh prezıdenti bolýǵa daıyn ekenin aıtqan. Degenmen Vens Tramptyń prezıdenttik merzimin tolyq aıaqtaıtynyna senimdi ekenin jetkizdi.

Osydan keıin jelide Trump is Dead, Trump Died jáne President Vance sııaqty izdeý suranystary AQSh-taǵy trendterdiń aldyńǵy qataryna shyqty. Newsweek basylymy atap ótkendeı, 30 tamyz tańyna qaraı Tramptyń ólimine qatysty posttar 1,3 mıllıonnan astam qoldanýshynyń nazaryn aýdarǵan.

Alaıda kóp uzamaı bul qaýesetter joqqa shyǵaryldy — Tramptyń óz nemeresimen birge Sterlıngtegi golf alańyna bara jatqan sýretteri jarııalandy.

Aıta keteıik, buǵan deıin Tramp AQSh-tyń burynǵy vıtse-prezıdenti Kamala Harrıske kórsetilip kelgen Qupııa qyzmettiń (Secret Service) qorǵaýyn toqtatqan bolatyn.