Tramp ózine Iran qastandyq jasasa, tutas eldi joıyp jiberetinin málimdedi
ASTANA. KAZINFORM – AQSh prezıdenti Donald Tramp Iran bıligi ózine qastandyq uıymdastyrǵan nemese ondaı áreketke barǵan jaǵdaıda jaýap retinde Iranǵa jappaı zymyran soqqysyn jasaý jóninde aldyn ala nusqaý bergenin málimdedi. Bul týraly VVS jazdy.
Tramptyń aıtýynsha, Iranmen kelissózder Tegerannyń ótinishi boıynsha jalǵasyp jatyr.
– Islam Respýblıkasyna baǵyttalǵan myń zymyran ushyrýǵa daıyn tur. Eger Iran bıligi AQSh-tyń qazirgi prezıdentin, ıaǵnı meni óltirýge áreket jasasa nemese óltirse, olardyń sońynan taǵy myńdaǵan zymyran jiberiledi, – dep jazdy ol Truth Social áleýmettik jelisinde.
AQSh prezıdenti áskerı buıryqtar áldeqashan berilgenin aıtyp, qajet bolǵan jaǵdaıda amerıkalyq ásker bir jyl ishinde Irannyń barlyq óńirin tolyqtaı joıyp jibere alatynyn málimdedi. Onyń sózinshe, bul merzim qajet bolǵan jaǵdaıda uzartylýy múmkin.
8 shildede AQSh pen Iran bir-birine qaıtadan soqqy jasap, keıin Tramp maýsym aıynan beri kúshinde bolǵan ýaqytsha bitimniń aıaqtalǵanyn jarııalaǵan edi.
AQSh Omannyń aýmaqtyq sýlary men Ormýz buǵazy mańyndaǵy úsh saýda kemesine jasalǵan shabýyldarǵa jaýap retinde Iranǵa jańa soqqylar jasap, Tegeranǵa munaı satýǵa múmkindik bergen lıtsenzııanyń kúshin joıdy.
Buǵan jaýap retinde Iran Kýveıt pen Bahreındegi AQSh áskerı bazalaryna soqqy jasady.
Keıin Tramp ózine qastandyq jasalýy múmkin ekenin aıtyp, biraq oǵan qatysty eshqandaı dálel keltirmedi.
– Men olardyń nysanasynda baıaǵydan beri birinshi oryndamyn. Eger maǵan birdeńe bolsa, olar buryn-sońdy kórmegen deńgeıde bombalanýy tıis degen nusqaý qaldyrdym, – dedi ol The New York Post basylymyna bergen suhbatynda.
Juma kúni The Wall Street Journal basylymy derekkózderge silteme jasap, Izraıl AQSh-qa Irannyń Trampqa qastandyq jasaýdyń jańa josparyn qarastyryp jatqany týraly barlaý málimetterin bergenin jazdy.
Alaıda Tramp bul aqparatty joqqa shyǵardy.
– Joq, joq. Izraıl eshteńe anyqtaǵan joq. Men áldeqashan olardyń joıý tiziminde birinshi oryndamyn. Ómir osyndaı. Eger birdeńe bolyp jatsa, meni saǵynatyn shyǵarsyzdar dep úmittenemin, – dedi AQSh prezıdenti.
Ormýz buǵazy ashyq bolýy kerek
AQSh Irandy Ormýz buǵazy halyqaralyq keme qatynasy úshin ashyq ekenin resmı túrde jarııalaýǵa jáne kommertsııalyq kemelerge jasalatyn shabýyldardy toqtatýǵa mindettenýge shaqyrdy. Bul talaptar senbi kúni Omanda ótetin kelissózderdiń kún tártibine engiziledi dep kútilip otyr.
Tramp ýaqytsha bitim aıaqtalǵanyn málimdegenine qaramastan, Vashıngton men Tegeran jaqynda bolǵan shıeleniske qaramastan kelissózderdi jalǵastyrýǵa ýaǵdalasqanyn aıtty.
AQSh sheneýnikteriniń málimetinshe, Iran Vashıngtonǵa saýda kemelerine shabýyldardy kelissózderdi buzýǵa tyrysqan radıkaldy top ókilderi jasaǵanyn habarlaǵan.
Aıta keteıik, AQSh-tyń Iranǵa jańa soqqylarynan keıin munaı baǵasy kúrt óskenin jazdyq.
