Tramp ózin Nobel syılyǵyna usynǵan Ázerbaıjan prezıdentine alǵys aıtty

ASTANA. KAZINFORM — AQSh prezıdenti Donald Tramp Ázerbaıjan prezıdenti Ilham Álıevke alǵys hatyn joldady, dep habarlaıdy Azertac.

Azertac habarlaǵandaı, Donald Tramp Ilham Álıevke onyń Armenııa premer-mınıstri Nıkol Pashınıanmen birge ózin Nobel beıbitshilik syılyǵyna usyný jónindegi birlesken haty úshin alǵys bildirgen.

«Osy joǵary baǵa úshin Sizge tereń rızashylyǵymdy bildiremin, bul bizdi mańyzdy mıssııamyzdy jalǵastyrýǵa shabyttandyrady. Amerıka Qurama Shtattarynyń Prezıdenti retinde men búkil álemdegi qaqtyǵystardy toqtatýǵa, beıbitshilikti jáne barlyq adamdardyń ıgiligin qamtamasyz etýge adal bolyp qala beremin. Sizben úzdiksiz seriktestik arqasynda biz múmkin emes dep sanalatyn nátıjelerge qol jetkizemiz», delingen Tramptyń Bakýge joldaǵan hatynda.

Sondaı-aq AQSh prezıdenti I.Álıevke turaqty qoldaýy úshin de alǵys aıtqan.

Eske sala keteıik, jaqynda Tramp FIFA-nyń alǵashqy Beıbitshilik syılyǵyn ıelendi.

Sondaı-aq Tramp Rojdestvoǵa deıin Gazadaǵy beıbitshilik protsesiniń II kezeńi bastalǵanyn jarııalamaqshy.