Tramp ózin AQSh tarıhyndaǵy eń eńbekqor prezıdent dep sanaıdy
ASTANA. QazAqparat - AQSh prezıdenti Donald Tramp el prezıdenttigine kirisken bes jarym aı ishinde Amerıka tarıhyndaǵy kez kelgen basqa kóshbasshylarǵa qaraǵanda, áldeqaıda kóp jumys atqarǵanyn málim etti. Ol bul pikirin Reuters-ke bergen suhbatynda bildirdi, dep habarlady Rosbalt.
«Bes aıda AQSh tarıhyndaǵy kez kelgen derlik prezıdentke qaraǵanda, kóp nársege qol jetkizdim», - dedi ol.
«Irak pen Sırııaǵa qaraıtyn bolsańyzdar, «Islam memleketimen» (DAISh - avt.) kúreste qol jetkizilgen ilgerileýdi kóre alasyzdar, bul tolyq derlik jetistik deýge bolady», - dedi Tramp.
Sondaı-aq prezıdent qazir Aq úıdegi kóńil-kúı erekshe keremet ekenin habarlady. Óziniń eńbeginiń jemisine sondaı-aq, amerıkalyq qor bırjasy kórsetkishteriniń ósýin, sońǵy 16 jylda AQSh-ta jumyspen qamtý málimetteriniń jaqsarýyn qosyp otyr.
«Demokrattar aıtyp jatqan bos sózderge qaramastan, Aq úıdiń de jumysy alǵa basýda», - dedi ol.
Tramp AQSh prezıdenti saılaýynda jeńiske jetkennen keıin, 20 qańtarda memleket basshysy laýazymyna kirisken bolatyn.
