Tramp osy joly jeńilip qalsa, qaıtadan saılaýǵa túspeıdi

ASTANA. KAZINFORM — AQSh-tyń burynǵy prezıdenti jáne prezıdenttikke úmitker Donald Tramp jeksenbi kúni qarashadaǵy saılaýda jeńilip qalsa, dodaǵa qaıta túspeıtinin málimdedi, dep habarlaıdy VVS.  

Sinclair Broadcast Group TV-niń Full Measure telebaǵdarlamasynyń júrgizýshisi suhbatynda odan qarasha aıynda Kamala Harrısten jeńilip qalsa, 2028 jyly prezıdenttikke taǵy úmitker bola ma, joq pa, sony surady.

«Joq. Meniń oıymsha, osymen bitti. Men ózimdi (qaıtadan saılaýǵa qatysqanymdy) múlde kórip turǵanym joq… Óte jaqsy jumys isteımiz dep úmittenemin», — deıdi 78 jastaǵy Tramp.

AQSh-ta zań boıynsha adam eki merzimnen artyq prezıdent bola almaıdy, sondyqtan ol jeńse, 2028 jyly saılaýǵa qaıta túse almaıdy.

Buǵan deıin Tramp saılaýda jeńilý múmkindigi týraly óte sırek aıtatyn — ol árqashan óz jaqtastaryna sóılegen sózinde jáne áleýmettik jelilerdegi jazbalarynda aldaǵy jeńisin senimdi túrde jarııalap keldi.

Biraq sońǵy tórt kúnde ol jeńilý yqtımaldyǵy týraly eki ret aıtty.