Tramp Ortalyq Azııa elderiniń basshylaryn Aq úıde qabyldaıdy
ASTANA. KAZINFORM — 6 qarasha kúni tústen keıin Donald Tramp Aq úıde Qazaqstan, Ózbekstan, Qyrǵyzstan, Tájikstan jáne Túrikmenstan prezıdentterimen jeke kezdesedi, dep habarlaıdy Kazinform agenttiginiń menshikti tilshisi.
«S5+1» formatynda ótetin kezdesýde taraptar AQSh pen Ortalyq Azııa elderi arasyndaǵy yntymaqtastyqtyń bolashaǵyna qatysty birqatar málimdeme jasaıdy dep kútilip otyr. Sondaı-aq ózara ózekti máseleler talqylanbaq.
Agenttik derekkózderiniń habarlaýynsha, Ortalyq Azııa memleketteriniń aldyn ala kelip jumys isteıtin delegatsııalary qazirdiń ózinde Vashıngtonǵa jetken. Olar amerıkalyq áriptesterimen birge aldaǵy joǵary deńgeıdegi kezdesýge daıyndalyp jatyr.
Aıta keteıik, dál sol kúni jergilikti ýaqyt boıynsha saǵat 12:30–da Vashıngtondaǵy Djon Kennedı atyndaǵy oryndaýshylyq óner ortalyǵynyń bir bóligi sanalatyn The Reach Kennedy Center ǵımaratynda «C5+1 formatynyń on jyldyǵyna arnalǵan» iskerlik konferentsııa ótedi. Bul ortalyq — AQSh-taǵy eń iri kontsert jáne opera alańdarynyń biri.
The Reach kesheni pavılondardan, repetıtsııalyq, mýzykalyq zaldardan, dáriske jáne kópfýnktsııaly kezdesýlerge arnalǵan Vashıngtondaǵy eń úlken jasyl shatyrdyń ústinde ornalasqan bólmelerden turady. Keshenniń zamanaýı arhıtektýrasy tabıǵatpen úılesip, qalanyń tarıhı nyshandary — Vashıngton monýmenti men Lınkoln memorıalynyń kórinisin tamashalaýǵa múmkindik beredi.
Qazaqstan delegatsııasynyń quramynda Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev bolady.
Bıznes konferentsııa aıasynda AQSh pen Ortalyq Azııa elderi arasyndaǵy ekonomıkalyq yntymaqtastyqty nyǵaıtýǵa arnalǵan birqatar sessııa ótedi dep josparlanyp otyr. Aldyn ala málimetterge sáıkes, sonyń nátıjesinde kólik dálizderi men jetkizý tizbekteri, energetıka jáne asa mańyzdy paıdaly qazbalar, tsıfrlandyrý men jasandy ıntellekt, bıznes ókilderiniń ózara is-qımyly sııaqty baǵyttar damı túsedi.
Sonymen qatar jınalǵandarǵa mádenı baǵdarlamalar men S5+1 elderiniń ulttyq stendteri usynylmaq.
Eske salsaq, osyǵan deıin AQSh Tramptyń tapsyrmasynan keıin alǵash ret ballıstıkalyq zymyran synaǵyn ótkizetindigi habarlanǵan.