Tramp Ormýz buǵazyndaǵy mınalardy tolyq tazartqanyn málimdedi
ASTANA. KAZINFORM — AQSh prezıdenti Donald Tramp amerıkalyq Áskerı-teńiz kúshteri Ormýz buǵazynyń halyqaralyq sýlaryndaǵy mınalardy zalalsyzdandyrý jumystaryn tolyq aıaqtaǵanyn jarııa etti, dep habarlaıdy Kazinform.
Amerıkalyq kóshbasshynyń aıtýynsha, AQSh Áskerı-teńiz kúshteri buǵazdan anyqtalǵan barlyq mınanyń alynyp tastalǵanyn nemese joıylǵanyn habarlaǵan.
Tramp Iranǵa buǵazǵa jańa mına ornatýdyń yqtımal saldary týraly eskertilgenin de aıtty.
— Jańa mına ornatatyn kez kelgen keme nemese qaıyq dereý jáne júıeli túrde joıylady, — dep jazdy ol Truth Social áleýmettik jelisinde.
AQSh prezıdentiniń sózinshe, Ormýz buǵazyndaǵy jaǵdaı AQSh Ǵarysh kúshteriniń múmkindikteri arqyly baqylaýda.
Sondaı-aq Tramp Pıkaks taýyn jáne buǵan deıin joıylǵan úsh ıadrolyq nysandy atap ótip, bul aýmaqtardyń da baqylaýda ekenin málimdedi.
Amerıkalyq kóshbasshy jańa mınalardy ornatýǵa qatysty «nóldik tózimdilik» saıasaty ustanylatynyn atap ótti.
Ormýz buǵazy — álemdik energetıkalyq saýdanyń mańyzdy baǵyttarynyń biri. Óńirdegi shıelenistiń saqtalýyna baılanysty buǵazdaǵy keme qatynasynyń qaýipsizdigi ózekti máselelerdiń biri bolyp otyr.
Buǵan deıin Tramp Oman Ormýz buǵazy jónindegi kelissózge kedergi keltirse, shabýyl jasaıtynyn aıtyp, qorqytqanyn jazǵan edik.
