Tramp Ontarıo kóliniń ataýyn «Amerıka kóli» dep ózgertýdi qarastyryp jatyr
ASTANA.KAZINFORM — AQSh prezıdenti Donald Tramp seısenbi kúni AQSh pen Kanada arasyndaǵy saýda qaqtyǵysynyń shıelenisýine baılanysty Ontarıo kóliniń ataýyn «Amerıka kóli» dep ózgertý múmkindigin qarastyryp jatqanyn málimdedi, dep habarlaıdy Euronews.
Bul ıdeıa Tramptyń byltyrǵy bastamasyna uqsaıdy. Ol óziniń jarlyǵymen Meksıka shyǵanaǵynyń ataýyn «Amerıka shyǵanaǵy» dep ózgertý týraly sheshim qabyldaǵan edi.
Qazir AQSh pen Kanada arasynda kúrdeli saýda daýy júrip jatyr. AQSh ákimshiligi demalys kúnderi jalpy quny 20 mıllıard dollar (17 mıllıard eýro) bolatyn kanadalyq taýarlarǵa 50 paıyzdyq baj salyǵyn engizgennen keıin Ottava jaýap sharalaryn jarııalaýy tıis. Bul sheshim eki el arasyndaǵy kelissózderdiń nátıjesiz aıaqtalýynan keıin qabyldandy.
— Biz Ontarıo kóline «Amerıka kóli» degen ataý berýdi shyndap qarastyryp jatyrmyz, óıtkeni Ontarıomen budan bylaı qandaı da bir mańyzdy saýda júrgizýge úmitimiz joq, — dep jazdy Tramp áleýmettik jelidegi paraqshasynda.
Ontarıo — Kanadanyń halqy eń kóp provıntsııasy ári eldegi avtomobıl ónerkásibiniń negizgi ortalyqtarynyń biri.
Eki el arasyndaǵy rıtorıka barǵan saıyn qatqyl sıpat alyp barady. Dúısenbide Tramp Kanada bıligine «baǵynýy» kerektigin, áıtpese qazirgi baj salyǵynan «áldeqaıda nashar» saldarǵa tap bolatynyn málimdedi.
Kanada premer-mınıstri Mark Karnı Vashıngtondy eldi ózine baǵyndyrýǵa tyrysyp otyr dep aıyptady. Sondaı-aq Tramp kanadalyq avtomobılderge, qosalqy bólshekter men bolatqa qosymsha 50 paıyzdyq baj salyǵyn engizemin dep qorqytty. Karnı óz kezeginde AQSh talaptary Vashıngtonnyń avtomobıl ónerkásibi, bolat jáne alıýmınıı óndirisi sııaqty Kanadanyń negizgi salalaryn «joıýǵa» umtylyp otyrǵanyn kórsetetinin aıtty.
Kanada men AQSh bir-biriniń iri saýda seriktesteriniń qatarynda. Avtomobıl, energetıka, aýyl sharýashylyǵy jáne óńdeý ónerkásibindegi jetkizý tizbekteri eki el arasynda tyǵyz baılanysty. Sondyqtan uzaqqa sozylatyn saýda soǵysy shekaranyń eki jaǵyndaǵy kompanııalar men jumysshylarǵa eleýli shyǵyn ákelýi múmkin.
Kanada qarjy mınıstri Fransýa-Fılıpp Shampan jáne úkimettiń taǵy úsh múshesi baj salyǵynyń engizilýinen zardap shekken jumysshylardy qoldaý sharalaryn jarııalaıdy dep kútilýde.
Buǵan deıin dúısenbide Karnı Kanada AQSh-tyń tarıfterine dál sondaı mólsherde baj salyǵyn engizetin «aınadaı jaýap» saıasatynan bas tartyp, kanadalyq jumysshylar men bıznesti qorǵaýǵa baǵyttalǵan neǵurlym nysanaly jaýap sharalaryna kóshýi múmkin ekenin málimdegen bolatyn.
— Kelissózder ústelinde Kanadany Amerıka Qurama Shtattarynyń enshiles kompanııasy retinde qarastyratyn tásilmen kelispeımiz, — dedi Karnı.
Frantsýz tilinde sóılegen sózinde Karnı budan da qatań pikir bildirdi.
— Kelissózder barysynda amerıkalyqtardyń avtomobıl ónerkásibin, bolat jáne alıýmınıı salalaryn qosa alǵanda, bizdiń negizgi óndiris oryndarymyzdy joıǵysy keletinin túsindik. Bul bizdiń «joq» dep aıtýymyzdyń basty sebepteriniń biri boldy. Bul nashar kelisim edi, — dedi ol.
Aıta ketelik AQSh prezıdenti Donald Tramp jaqyn arada Ormýz buǵazyn Amerıka Qurama Shtattarynyń aýmaǵy dep jarııalaý nıeti bar ekenin málimdegen edi.
