Tramp Ontarıo kóliniń ataýyn «Amerıka kóli» dep ózgertti
ASTANA. KAZINFORM — AQSh prezıdenti Donald Tramp beısenbi kúni Ontarıo kóliniń ataýyn «Amerıka kóli» dep ózgertý týraly jarlyqqa qol qoıdy. Sheshim Kanadamen saýda soǵysy kúsheıgen tusta qabyldanyp otyr. Bul týraly Vashıngtondaǵy Kazinform tilshisi NBC News-ke silteme jasap habarlaıdy.
Aq úı basshysy AQSh pen Kanada shekarasyndaǵy kóldiń ataýyn ózgertý úshin «barlyq qajetti qujattar men basqa da materıaldardy tapsyrǵanyn» aıtty.
— Biz tıisti adamdardyń barlyǵyna habar berdik, ıaǵnı biz isteýimiz qajet protsedýralardyń bárin oryndadyq. Bul — birden kúshine enetin resmı sheshim, — dedi Donald Tramp.
⚠️ TDS TRIGGER WARNING: Lake America is officially on the map. 🇺🇸🦅
— The White House (@WhiteHouse) August 27, 2026
What’s next? pic.twitter.com/YCQoBXpt79
Kanadanyń premer-mınıstri Mark Karnı Tramptyń sheshiminen keıin kóp uzamaı X-tegi jazbasynda bul ataý Kanada men AQSh memleketi qurylmaı turyp paıda bolǵanyn atap ótti.
— Ontarıo kóliniń ataýy vendat tilindegi «Ontari’io» sózinen shyqqan. Ol «ádemi kól, úlken kól» degen maǵynany bildiredi. Bul ataý 400 jyldan astam ýaqyt buryn paıda bolǵan, ıaǵnı ol Kanadanyń konfederatsııasy qurylyp, AQSh táýelsizdigin jarııalaǵanǵa deıin qalyptasqan, — dedi Mark Karnı.
Ótken jyly Tramp Meksıka shyǵanaǵynyń ataýyn «Amerıka shyǵanaǵy» dep ózgertken edi. AQSh Іshki ister mınıstrligi, Google jáne Apple bul dırektıvany oryndady, alaıda álemniń basqa elderi bul ataýdy qabyldaǵan joq.
Buǵan deıin AQSh pen Kanada arasyndaǵy saýda soǵysy týraly habarlanǵan bolatyn. Atap aıtqanda, Kanada AQSh ekonomıkasyna qalaı qarsy soqqy bere alatynyn málimdegen edi.
Al Tramp bolsa, Kanadadan ákelinetin kólikke 50 paıyzdyq baj salyǵyn engizbek.
Sondaı-aq AQSh pen Kanada saýda kelisimine kele almaǵany jaıly da jazǵan edik.
Aqzat Jıenalına
