Tramp ondaǵan elge, sonyń ishinde Qazaqstanǵa qatysty baj salyǵyn engizdi
ASTANA. KAZINFORM — AQSh prezıdenti Donald Tramp birqatar elge, sonyń ishinde Qazaqstanǵa da jańa kedendik baj salyǵyn engizdi. Ol qol qoıǵan jarlyq Aq úıdiń saıtynda jarııalanǵan.
Tizimde 70-ke jýyq memleket pen Eýropalyq Odaq atalǵan. Importtyq baj salyǵynyń kólemi 10-nan 41 paıyzǵa deıin ózgeredi. Eń joǵary tarıfterdiń keıbiri Sırııaǵa (41%), Laos pen Mıanmaǵa (40%) jáne Shveıtsarııaǵa (39%) belgilengen.
Qazaqstan úshin bul kórsetkish 25 paıyz.
EO, Japonııa jáne Ońtústik Koreıa úshin 15% kóleminde qosymsha aqy qarastyrylǵan.
Tizimde joq elder úshin 10% mólsherindegi biryńǵaı tarıf qoldanylady.
Baj salyǵy buryn kútilgendeı 1 tamyzda emes, 7 tamyzda kúshine enedi, óıtkeni jańa erejelerdi engizý úshin kóbirek ýaqyt qajet.
Aq úı qujatyna sáıkes, shara «amerıkalyq jumysshylardyń múddeleri úshin jahandyq saýdany qaıta qurylymdaýǵa» baǵyttalǵan.
7 shildede Donald Tramp Truth Social áleýmettik jelisinde Qazaqstan Prezıdenti Qasym-Jomart Toqaevqa joldaǵan hatty jarııalap, AQSh-tyń 1 tamyzdan bastap Qazaqstannan keletin barlyq ımportqa 25 paıyzdyq kedendik baj salyǵyn engizetinin habarlady.
Truth Social áleýmettik jelisinde jarııalanǵan hatta Tramp 1 tamyzdan bastap AQSh Qazaqstannan AQSh-qa jetkiziletin barlyq ımportqa 25 paıyzdyq ımporttyq baj salyǵyn engizetinin málimdedi. Donald Tramp Qazaqstanmen saýda qatynastarynyń mańyzdylyǵy men beriktigin atap ótti. Sondaı-aq ol saýda tapshylyǵyna qaramastan Qazaqstanmen yntymaqtastyqqa daıyn ekenin atap ótti.
Sáýir aıynda Tramp memleketterge barlyq salany qamtıtyn baj salyǵyn engizýdi josparlap otyrǵanyn jazǵan edik.
Keıin Qazaqstan Respýblıkasy Saýda jáne ıntegratsııa mınıstrliginiń AQSh-tyń birqatar taýarǵa jańa kedendik bajdar engizýine qatysty málimdemesi jarııalandy.
— Bul rette qazaqstandyq eksporttyń basym bóligi jańa tarıfterden bosatýǵa baılanysty jańa baj salyǵynsyz jetkizile beredi. Bul negizgi shıkizat pen strategııalyq taýarlar — munaı, ýran, kúmis, ferroqorytpa, tantal men tıtanǵa qatysty. Esepteý boıynsha, qabyldanǵan sharalar Qazaqstannyń AQSh-qa eksportynyń 95 paıyzǵa jýyǵyna áser etpeıdi, — dep habarlady vedomstvo.
Saýda jáne ıntegratsııa mınıstrligi qazaqstandyq taýarlardyń boljamdy saýda rejımin saqtaý boıynsha jumys aıasynda Qazaqstan Úkimeti AQSh-tyń Aq úı ákimshiligine ózara saýda sharttaryn jaqsartý boıynsha naqty usynystar men bastamalar joldaǵanyn habarlady. Qazaqstannyń maqsaty – naryqqa shyǵý jáne saýda sharttary máseleleri boıynsha kelisilgen sheshimderge qol jetkizý.
— Qazirgi ýaqytta amerıkalyq tarap Qazaqstannyń usynystaryn qarastyryp jatyr jáne kelissóz ótetin kúni týraly habarlaıtyn bolady. Qazaqstan ulttyq múddelerdi qorǵaý jáne turaqty saýda-ekonomıkalyq áriptestikti damytý maqsatynda amerıkalyq tarappen odan ári kelissóz júrgizýge daıyndalyp jatyr, — dep atap ótti vedomstvo.
Premer-mınıstrdiń orynbasary — Ulttyq ekonomıka mınıstri Serik Jumanǵarın AQSh-tyń Qazaqstan eksportyna engizgen baj mólsherlemesi týraly pikir bildirdi.
Onyń aıtýynsha, AQSh-tyń Qazaqstan eksportyna engizgen baj mólsherlemesi eki aradaǵy alys-beriske 5 paıyz kóleminde ǵana áser etedi.
— Bul oqıǵada biz aqparat alyp qana otyrǵan tarappyz. Ázirge biz eshkimge qarymta baj engizý máselesin qarastyryp otyrǵan joqpyz. Bizge qarsy engizilgen bajdardyń kóp bóligi jumys istemeıdi. Óıtkeni biz usynatyn taýarlar erekshe tizimde. Qazaqstan shıkizat taýarlary boıynsha Eýropa men Amerıka elderi úshin senimdi jetkizýshi bolyp esepteledi. Ýran, shıki munaı, kúmis, kómirtegi deńgeıi joǵary ferrohrom — erekshe tizimdegi taýarlar. Engizilgen bajdyń ol taýarlarǵa yqpaly joq, — dedi Serik Jumanǵarın.
Eske sala ketsek, 2 sáýirde rezıdent Donald Tramp AQSh-tyń barlyq saýda seriktesteri úshin 10% tarıfti jáne óziniń «Amerıka birinshi kezekte» atty baǵdarlamasy aıasynda ózge ondaǵan memleketke barlyq salany qamtıtyn joǵary baj salyǵyn engizýdi qarastyratyn paketin usyndy.