Tramp Oman Ormýz buǵazy jónindegi kelissózge kedergi keltirse, shabýyl jasaıtynyn aıtyp, qorqytty
ASTANA.KAZINFORM - AQSh prezıdenti Donald Tramp eger Oman Ormýz buǵazyn baqylaýǵa alý týraly kelisimge kedergi keltirse, oǵan shabýyl jasaımyn dep qorqytty, dep habarlaıdy agenttiktiń Vashıngtondaǵy tilshisi NBC News-ke silteme jasap.
- Eger Oman jolymyzdy kesse, biz ony túk qaltyrmaı bombalaımyz, - dedi Tramp Fox News-tiń bas halyqaralyq tilshisi Treı Instpen telefon arqyly sóılesýinde.
Inst efırden Tramptyń Ormýz buǵazynyń mártebesi boıynsha Oman men Iran arasyndaǵy kelissóz týraly suraqqa bergen jaýabyn jarııalady. Alaıda suhbattyń aýdıojazbasy berilmegen.
Sol kúni Aqúıdegi jýrnalıstermen kezdesýde tilshiler Tramptan efırde aıtylǵan sózdi naqtylaýyn surady.
- Men olar ózderin durys ustamady, dep oılamaımyn. Biraq biz basqa máselelerdi sheshkenimiz sııaqty, olarmen de ońaı til tabysar edik, - dedi Donald Tramp.
Iemen, BAÁ jáne Saýd Arabııasymen shekaralas ári Ormýz buǵazyna jaqyn ornalasqan Oman Iranmen osy mańyzdy teńiz joly boıynsha kelissóz júrgizip jatyr.
Senbi kúni Irannyń jartylaı resmı Mehr News aqparat agenttigi Irannyń Omanmen sý joly arqyly keme qozǵalysy boıynsha kelisimge kelgenin habarlady.
Teńiz trafıgin baqylaý jónindegi MarineTraffic qyzmetiniń málimetinshe, Ormýz buǵazyndaǵy keme qatynasy demalys kúnderi is júzinde toqtap qalǵan, tek 13 keme ótti, onyń úsheýi jeksenbi kúni ótken.
Dúısenbi kúni AQSh pen Irannyń maýsym aıyndaǵy soǵysty toqtatýǵa jáne Irannyń ıadrolyq baǵdarlamasy boıynsha kelisimge kelýge belgilegen 60 kúndik merzimi aıaqtaldy.
Tramptyń qoqan-loqysyna jaýap retinde demokrat senator Tım Keın dúısenbi kúni Senat tamyz aıyndaǵy demalysynan oralǵan soń, Omanǵa qarsy áskerı áreketterge tyıym salatyn Soǵys ókilettikteri týraly zańǵa sáıkes qarar engizýdi josparlap otyrǵanyn aıtty, dep habarlaıdy JNS.
Keın Tramptyń «Omanǵa shabýyl jasaımyn» dep qorqytýy prezıdenttiń «álem boıynsha soǵys órtin tutatyp, qoqan-loqy kórsetý naýqany arqyly esinen adasyp bara jatqanyn» dáleldeıtinin aıtty.
- Men bul soqyr, bılikke mastanǵan prezıdenttiń AQSh pen álemge budan da kóp zııan keltirýine jol bermeıtin respýblıkashyl áriptesterim tabylatynyna úmittenemin, - dedi senator.
Buǵan deıin AQSh prezıdenti Donald Tramp jaqyn arada Ormýz buǵazyn Amerıka Qurama Shtattarynyń aýmaǵy dep jarııalaý nıetin málimdegen bolatyn.
