Tramp Nıý-Iorktegi saıabaqta at arbalarǵa tyıym salýǵa qarsy shyqty
ASTANA. KAZINFORM — AQSh prezıdenti Donald Tramp Nıý-Iork bıliginiń Ortalyq saıabaqta at arbalardyń júrýine tyıym salý týraly sheshimin synǵa aldy. Onyń aıtýynsha, ǵasyrdan astam tarıhy bar bul dástúrdiń toqtaýy qala tarıhynyń bir bóligin joǵaltýmen teń. Bul týraly AQSh prezıdenti Truth Social jelisindegi jazbasynda jarııalady.
Tramp óz jazbasynda Ortalyq saıabaqta júz jyldan astam ýaqyt boıy týrısterdi serýendetýge paıdalanylyp kelgen jylqyǵa jegilgen arbalardyń qyzmeti toqtaıtynyna ókinish bildirdi.
— Ortalyq saıabaqtaǵy ǵasyrdan astam tarıhy bar, kópshilik jaqsy kóretin at jegilgen arbalar dástúriniń aıaqtalyp kele jatqany ókinishti. Buǵan kóbine bir qaıǵyly oqıǵa sebep boldy. Bul mańda kólik apattary jıi bolady, biraq sol úshin kólikterdiń saıabaqqa kirýine tyıym salynbaıdy. Endeshe, arbalarǵa nege tyıym salynady? Bul tamasha dástúr edi. Qala tarıhynyń taǵy bir bóligi ótkenniń enshisinde qalǵaly tur. Biz ony saǵynatyn bolamyz, — dep jazdy AQSh prezıdenti.
22 qazanda Nıý-Iork qalalyq keńesi at arbalarǵa tyıym salýdy kózdeıtin zań jobasyn maquldady.
Qujatqa sáıkes, 2028 jylǵy 1 maýsymnan bastap qalada kommertsııalyq maqsatta at arbalardy paıdalanýǵa tyıym salynady. Zań jobasyn Nıý-Iork meri Zohran Mamdanı men qalalyq keńes tóraıymy Djýlı Menın qoldap otyr.
Bastama Ortalyq saıabaqta bolǵan qaıǵyly oqıǵadan keıin «Romanch zańy» dep ataldy. 2026 jyly maýsym aıynda 18 jastaǵy týrıst Romanch Mahadjan at arbadan qulap, qaza tapqan.
Tyıymdy qoldaýshylar janýarlardy qorǵaý jáne saıabaqqa kelýshilerdiń qaýipsizdigin arttyrý qajettigin alǵa tartady. Al osy sala ókilderi jumys oryndarynyń qysqarýy jáne Nıý-Iorktegi ejelgi týrıstik dástúrlerdiń biriniń joıylýy múmkin ekenin eskertedi.
Zań jobasynda osy salada eńbek etetin adamdardy qoldaý baǵdarlamasyn ázirleý qarastyrylǵan. Onyń aıasynda jumysqa ornalasýǵa kómektesý jáne qaıta daıarlaý sharalary júzege asyrylmaq. Sondaı-aq arbalardy paıdalanýǵa tyıym salynǵannan keıin qala bıligi jylqylarǵa izgilik qaǵıdattaryna saı kútim jasalýyn qamtamasyz etýge tıis.
Qalalyq keńes maquldaǵannan keıin qujatty túpkilikti rásimdeýdenn ótkizý qajet.
Buǵan deıin Italııada týrısterge arnalǵan at arbalarǵa tyıym salynýy múmkin ekenin jazǵan bolatynbyz.
