Tramp Nıý-Meksıko shtatyn «Jańa Amerıka» dep qaıta ataýdy usyndy
ASTANA. KAZINFORM — AQSh prezıdenti Donald Tramp Nıý-Meksıko shtatynyń ataýyn New America («Jańa Amerıka») dep ózgertýdi usyndy. Ol Truth Social jelisindegi jazbasynda bul bastamany kópshilik qoldaıtynyn aıtyp, jańa ataý áldeqaıda bedeldi ári tartymdy estiletinin jetkizdi, dep habarlaıdy Kazinform BILD basylymyna silteme jasap.
Nıý-Meksıko gýbernatory Mıshel Lýhan-Grıshem bul usynysty qabyldamady.
— Bul ataý Amerıka Qurama Shtattary qurylǵanǵa deıin-aq paıda bolǵan, — dedi ol Fox News-ke bergen suhbatynda.
Sondaı-aq gýbernator Trampty janarmaıdyń qymbattaýynan jurttyń nazaryn basqa jaqqa burýǵa tyrysyp otyr dep aıyptady.
Tramp Nıý-Meksıko shtatynda saılaýǵa qatysty «burmalaýshylyqtar» jıi kezdesedi dep esepteıtinin aıtyp, usynysyn osy pikirmen baılanystyrdy.
Aq úı qazirdiń ózinde New Mexico ataýyndaǵy Mexico sóziniń syzylyp, ornyna America sózi jazylǵan sýretti jarııalady.
Amerıkalyq BAQ-tyń málimetinshe, bul ıdeıa alǵashynda ınternettegi ázil retinde paıda bolǵan.
Eske salaıyq, bul Donald Tramptyń mundaı bastamany alǵash ret kóterýi emes. Buǵan deıin Google Maps servısi AQSh Prezıdentiniń 27 tamyzdaǵy jarlyǵyna sáıkes, Ontarıo kóliniń ataýyn amerıkalyq paıdalanýshylar úshin «Amerıka kóli» dep ózgertkenin habarlaǵan edik.
Sondaı-aq Donald Tramp strategııalyq mańyzy bar sý joly AQSh baqylaýyna ótkenin málimdep, Ormýzdy «Tramp buǵazy» dep qaıta ataýdy usyndy.
