Tramp Netanıahýmen kezdesýde Gaza sektoryn baqylaýǵa alý ıdeıasyn taǵy da alǵa tartty
ASTANA. KAZINFORM – AQSh prezıdenti Donald Tramp pen Izraıl premer-mınıstri Bınıamın Netanıahý eki saǵatqa jýyq ýaqyt ótken kezdesý barysynda Gaza, Sırııa, Irandy jáne tarıfter máselesin talqylady, dep habarlaıdy Kazinform agenttiginiń menshikti tilshisi.
Tramp Gaza sektoryn «erkin aımaqqa» aınalýy múmkin ekenin málimdep, ony baqylaýǵa alý ıdeıasyn taǵy da alǵa tartty, dep habarlaıdy NBC News.
- Men bul jyljymaıtyn múliktiń óte mańyzdy nysany dep oılaımyn. Meniń oıymsha, bul biz qatysa alatyn nárse, biraq, siz bilesiz be, ol jerde Qurama Shtattary sııaqty Gaza sektoryn baqylaıtyn jáne oǵan ıelik etetin bitimgershilik kúshteri bolǵany jaqsy bolar edi, - dep málimdedi Donald Tramp.
Tramp sonymen birge Sırııadaǵy yqpal etý úshin qaqtyǵysqa daıyn turǵan Izraıl men Túrkııa arasynda deldal bola alatynyn habarlady, dep jazdy The Times of Israel.
Amerıkalyq kóshbasshy Túrkııa prezıdenti Rejep Taııp Erdoǵanmen jaqsy qarym-qatynasta ekenin, ony óte jaqsy kóretinin jáne ony «óte aqyldy» dep sanaıtynyn habarlady.
Prezıdent Tramptyń málimdeýinshe, Qurama Shtattar senbi kúni ıadrolyq kelisimdi talqylaý úshin Iranmen «tikeleı» kelissóz júrgizedi. Degenmen ırandyq sheneýnikter josparda omandyq dıplomattardy deldal retinde paıdalaný bar ekenin aıtty, dep habarlaıdy The New York Times.
Tramp josparlaryn Netanıahýmen kezdeskennen keıin jarııalap, kelissóz sátsiz aıaqtalsa, Iranǵa «úlken qaýip tónetinin» atap ótti.
Tramp pen Netanıahý sársenbide kúshine enetin Izraılden ımporttalatyn AQSh-tyń jańa 17% tarıfterin de talqylady, dep habarlaıdy CBS News.
Netanıahý Izraıldiń jaqyn arada eliniń AQSh-pen saýda tapshylyǵy máselesin sheshetinin aıtty.
- Biz Qurama Shtattarmen saýda tapshylyǵyn joıamyz. Biz muny óte jyldam oryndaýdy kózdep otyrmyz. Bul durys dep esepteımiz. Sondaı-aq biz saýda kedergilerin joıamyz, - dep habarlady Benıamın Netanıahý.
Bul Tramptyń qańtarda bılikke kelgennen beri Netanıahýdyń Aq úıge ekinshi sapary. Buǵan deıin Izraıl premer-mınıstri AQSh-qa aqpan aıynyń basynda barǵan bolatyn. Olardyń sońǵy kezdesýinen beri HAMAS pen Izraıl arasyndaǵy bitim buzyldy.
Buǵan deıin Izraıl Gazadaǵy áskerı operatsııasyn keńeıtkenin jazǵan bolatynbyz.