Tramp Netanıahýdy Gazadaǵy beıbitshilik josparyn bastaýǵa shaqyrdy
ASTANA. KAZINFORM — AQSh prezıdenti Donald Tramp telefon arqyly áńgime barysynda Izraıl premer-mınıstri Bınıamın Netanıahýdy Gazadaǵy beıbitshilik josparyn ilgeriletýdi surady, dep habarlaıdy Kazinform agenttiginiń menshikti tilshisi NEWSMAX basylymyna silteme jasap.
Tramp Izraıldiń kelesi úkimetin kim jasaqtaıtyny belgisiz bolyp otyrǵanyna qaramastan, jospardy júzege asyrýǵa kirisý qajettigin aıtty.
Josparda HAMAS-ty qarýsyzdandyrý, Gaza sektoryn demılıtarızatsııalaý jáne aýmaqty basqarý jaýapkershiligin Palestınanyń jańa tehnokratııalyq úkimetine berý kózdelgen.
Bastama Izraıldegi saılaý naýqanyna baılanysty birneshe aı boıy toqtap qalǵan bolatyn.
Tramp qurǵan Beıbitshilik keńesi Palestına tehnokratııalyq bıligi men halyqaralyq turaqtandyrý kúshin qamtıtyn negizdemelik kelisimdi ázirleýge birneshe aı jumsady.
Shilde aıynda Beıbitshilik keńesi HAMAS-pen Gazadaǵy qarýly toptardy qarýsyzdandyrý, azamattyq jáne qaýipsizdik fýnktsııalaryn Palestına úkimetine berý týraly 15 tarmaqtan turatyn usynys boıynsha kelisimge keldi.
Tamyz aıynda Izraılge saparlaǵan AQSh prezıdentiniń keńesshisi Djared Kýshner Netanıahýǵa HAMAS alǵash ret qarýsyzdandyrýǵa keliskenin habarlady.
HAMAS Gazada óziniń áskerı múmkindikterin qalpyna keltirip, qaıta qarýlanyp jatyr dep málimdegen Netanıahý buǵan óte kúmánmen qaraıdy.
Qyrkúıek aıynda Beıbitshilik keńesi Gazany qalpyna keltirýge arnalǵan $2,45 mıllıardtyń josparyn usynǵan. Qujatta sektordyń ınfraqurylymyn, ekonomıkasyn jáne anklavty basqarý júıesin qalpyna keltirýge arnalǵan 66 jobany júzege asyrý qajettigi baıandalǵan.
BUU Saýda jáne damý jónindegi konferentsııasynyń esepteýinshe, Gaza sektoryn qalpyna keltirý jáne qaıta qurý jumystaryna 71,5 mıllıard dollar qajet.
