Tramp: Netanıahý Iranmen jasalǵan kez kelgen beıbit kelisimdi qabyldaıdy
ASTANA. KAZINFORM – AQSh prezıdenti Izraıl premer-mınıstri Bınıamın Netanıahýniń Iranmen jasalatyn kez kelgen beıbit kelisimdi qabyldaıtynyn málimdedi, óıtkeni onyń «basqa amaly joq», dep jazady Financial Times.
AQSh prezıdenti Donald Tramp AQSh pen Izraıldiń Iranǵa qarsy jalǵasyp jatqan soǵysy aıasynda Izraıl premer-mınıstri Bınıamın Netanıahýdyń Vashıngton men Iran arasynda qol jetkiziletin kez kelgen kelisimdi qabyldaýdan basqa tańdaýy bolmaıtynyn aıtty. Tramp bul pikirin 7 maýsym, jeksenbi kúni keshke jarııalanǵan Financial Times gazetine bergen suhbatynda bildirdi.
– Barlyq sheshimdi men qabyldaımyn. Ol (Netanıahý – red.) sheshim qabyldamaıdy, – dedi Aq úı basshysy.
Suhbat Izraıldiń Iran tarapynan jasalǵan zymyrandyq soqqy týraly habarlamasynan keıin kóp uzamaı jarııalandy. Islam revolıýtsııasy saqshylary korpýsy bul shabýyldy Izraıldiń Lıvandaǵy «Hezbolla» nysanyna jasaǵan soqqysyna jaýap retinde berilgen «eskertý» dep atady.
AQSh prezıdenti FT basylymyna bergen suhbatynda Irannyń Izraılge jasaǵan soqqylary onyń Islam Respýblıkasymen beıbit kelisimge qol jetkizý nıetin ózgertpeıtinin aıtty.
– Bul kelisimge eshqandaı áser etpeıdi. Ne bolatynyn kóreıik. Biraq olar (Izraılge jasalǵan zymyrandyq soqqylar – red.) eshqandaı nátıje bermegen shabýyldar boldy. Bul 3000 jyldan beri nemese qalaı eseptegenińizge baılanysty 47 jyldan beri jalǵasyp kele jatqan nárselerdiń biri, – dep keltiredi Tramptyń sózin basylym.
Sonymen birge Aq úı basshysy eger beıbit kelisimge qol jetkizý múmkin bolmasa, áskerı kúsh qoldanýǵa qaıtadan júginetinin atap ótti.
Eske sala ketsek, buǵan deıin Tramptyń Iranǵa qatysty saıasaty respýblıkashyldar arasynda synǵa ushyraı bastaǵanyn jazdyq.
