Tramp NATO sammıtinen keıin odaqtastaryna qatysty ustanymyn jumsartty
ASTANA. KAZINFORM – NATO-nyń Ankaradaǵy sammıti aıaqtalǵannan keıin AQSh prezıdenti Donald Tramp alıanstaǵy odaqtastaryna qatysty ustanymyn jumsartyp, jıynnyń nátıjesin joǵary baǵalady. Bul týraly Euronews jazdy.
Sammıt barysynda Eýropa elderiniń kóshbasshylary qorǵanys shyǵyndaryn edáýir arttyrǵanyn kórsetip, Trampty qorǵanys bıýdjetterin ulǵaıtý jáne óz qaýipsizdigi úshin jaýapkershilikti kóbirek óz moınyna alý jónindegi ýádelerin oryndap jatqanyna sendirýge tyrysty.
Sammıttiń negizgi otyrysy aıaqtalǵan soń Donald Tramp buǵan deıin Iranǵa qarsy áskerı naýqanǵa qatysty odaqtastaryn qatań synǵa alǵanyna qaramastan, olarǵa qatysty kózqarasyn ózgertti.
Sarapshylardyń pikirinshe, bul birneshe saǵattyń ishinde qarsy kózqarastan jyly qarym-qatynasqa aýysqan AQSh prezıdentiniń saıası ustanymynyń qubylmalylyǵyn taǵy bir ret kórsetti.
– Bul shynymen de tańǵalarlyq boldy. Zaldaǵy birlik erekshe sezildi. Tipti mahabbattyń lebi baıqaldy deýge bolady. Munyń bári óte áserli ótti, – dedi Tramp.
Ol bul pikirin Ankara sammıtine qatysqan 32 el kóshbasshysynyń jabyq otyrysynan keıin jýrnalısterge aıtty.
– Bul óte tabysty sammıt boldy, – dep túıindedi AQSh prezıdenti.
Eske sala ketsek, Ankaradaǵy sammıt kezinde Tramp AQSh Grenlandııany baqylaýǵa alýy tıis ekenin taǵy málimdedi.
