Tramp NATO-ǵa ókpeli: AQSh-qa endigári bul uıym elderiniń kómegi qajet emes

ASTANA. KAZINFORM – Donald Tramp AQSh-tyń NATO-daǵy «kóptegen odaqtasy» Vashıngtonǵa Iranǵa qarsy áskerı operatsııaǵa aralasqysy kelmeıtinin habarlaǵanyn málimdedi. Tramp bul pikirin óziniń Truth Social áleýmettik jelisindegi jazbasynda bildirdi.

– Meni olardyń áreketi tańǵaldyrmaıdy, sebebi men árqashan NATO-ny birjaqty qozǵalys kóshesi dep sanaıtynmyn. Biz bul elderdi qorǵaýǵa jyl saıyn júzdegen mıllıard dollar jumsaımyz, al olar biz úshin, ásirese qıyn sátte, eshteńe istemeıdi, — dep jazdy ol.

Sondaı-aq Tramp AQSh pen Izraıl Irannyń armııasyn, flotyn jáne áýe kúshterin joıyp, el basshylyǵynyń barlyq derlik deńgeıdegi ókilderin óltirgenin taǵy da qaıtalady.

Osyǵan baılanysty, onyń aıtýynsha, AQSh-qa NATO elderiniń kómegi qajet emes.

– Biz eshqashan muqtaj bolǵan emespiz! Bul Japonııa, Aýstralııa nemese Ońtústik Koreıaǵa da qatysty. Biz eshkimniń kómegine muqtaj emespiz, — dep qosty amerıkalyq kóshbasshy.

Eske sala ketsek, buǵan deıin AQSh prezıdenti Eýropa elderi AQSh-qa járdemdespese, NATO-nyń bolashaǵy bulyńǵyr ekenin aıtqan.