Tramp NATO Bas hatshysy Rıýttemen kezdesti

ASTANA. KAZINFORM — AQSh prezıdenti Donald Tramp NATO Bas hatshysy Mark Rıýttemen jabyq kezdesý ótkizdi, dep habarlaıdy Associated Press.

Kelissózder Aq úı basshysynyń eldiń NATO-dan shyǵý múmkindigi týraly málimdemeleri aıasynda ótti. Buǵan deıin taraptar Ormýz buǵazy arqyly qaýipsiz keme qatynasyn qaıta jandandyrý máselesin talqylaýy tıis ekeni habarlanǵan bolatyn.

Keıin CNN-ge bergen suhbatynda Rıýtte Tramptyń áńgime barysynda Irandaǵy operatsııa aıasynda Vashıngtonnyń keıbir odaqtastarynyń áreketterine kóńili tolmaǵanyn aıtyp, amerıkalyq kóshbasshynyń narazylyǵyn túsinetinin jetkizdi.

— Ol, árıne, NATO-daǵy keıbir odaqtastaryna kóńili tolmaı otyr, men ony túsinemin. Sonymen birge men eýropalyq elderdiń basym bóligi bazalar, logıstıka, ushý turǵysynan paıdaly bolǵanyn jáne óz mindettemelerin oryndaǵanyn atap óttim, — dedi Rıýtte.

Buǵan deıin Tramp ABC telearnasyna bergen suhbatynda Vashıngtonnyń seriktesterin Iranǵa qarsy áskerı operatsııaǵa qosylýǵa shaqyrýy NATO úshin synaq bolǵanyn, alaıda alıans bul synaqtan óte almaǵanyn málimdegen.

Eske salaıyq, osyǵan deıin NATO Bas hatshysy AQSh-qa resmı saparmen baratyny habarlandy. Búgin Mark Rıýtte Ronald Reıgan atyndaǵy Prezıdenttik qor ınstıtýty uıymdastyrǵan pikirtalasqa qatysýy qajet.