Tramp NASA basshylyǵyna jańa kandıdatýra usynbaq

ASTANA.KAZINFORM —  AQSh Prezıdenti Donald Tramp aldaǵy ýaqytta AQSh-tyń Ulttyq aeronavtıka jáne ǵarysh keńistigin zertteý basqarmasy (NASA) basshysy laýazymyna jańa kandıdatýrany jarııalaıtynyn málimdedi. 

— Men Djared Aızekmannyń NASA basshysy qyzmetine kandıdatýrasyn qaıtaryp alamyn. Jaqynda men Amerıkany ǵarysh keńistiginde birinshi orynǵa shyǵaratyn jańa kandıdatýrany jarııalaımyn, — dep jazdy Tramp Truth Social áleýmettik jelisinde. 

Buǵan deıin The Washington Post gazetiniń derekkózderge silteme jasap habarlaýynsha, juma kúni Aq úı mıllıarder Djared Aızekmanǵa onyń kandıdatýrasy qaıtarylyp alynatyny týraly resmı túrde habarlaǵan.

Aıta keteıik, sáýir aıynyń sońynda AQSh Kongresiniń Senatyndaǵy kommertsııa, ǵylym jáne kólik komıteti Aızekmannyń NASA basshysy qyzmetine kandıdatýrasyn maquldaýdy usynǵan bolatyn. Onyń kandıdatýrasy boıynsha Senatta sońǵy daýys berý kelesi aptada ótýi tıis edi.

Ótken jyldyń qyrkúıek aıynda 42 jastaǵy mıllıarder Djared Aızekman Polaris Dawn atty alǵashqy kommertsııalyq ǵarysh mıssııasyna qatysty. Crew Dragon kemesiniń kapıtany retinde ol ınjener Sara Djıllıspen birge tarıhta alǵash ret kásibı emes astronavtardyń ashyq ǵaryshqa shyǵýyn júzege asyrdy.

Aızekman mıllıarder Ilon Masktyń SpaceX kompanııasymen tyǵyz yntymaqtastyq ornatqan.