Tramp munaı kompanııalaryn joǵary paıda tapqany úshin synǵa aldy
ASTANA. KAZINFORM — AQSh prezıdenti Donald Tramp eldiń iri munaı kompanııalary – ExxonMobil men Chevron-nyń tabysy aıtarlyqtaı artqanyn synǵa alyp, olardy tutynýshylar úshin janarmaı baǵasyn tómendetýge jáne tapqan tabysynyń bir bóligin amerıkalyqtarǵa qaıtarýǵa shaqyrdy. Bul týraly Kazinform agenttiginiń Vashıngtondaǵy menshikti tilshisi FOX Business arnasyna silteme jasap habarlady.
Tramptyń aıtýynsha, munaı naryǵyndaǵy tapshylyq saldarynan kompanııalar «tym kóp tabys» taýyp otyr. Ol erkin kásipkerlikti qoldaıtynyn aıtqanymen, korporatsııalardyń paıdasy kúrt ósip, al tutynýshylar qymbat janarmaı satyp alýǵa májbúr bolatyn jaǵdaıdy ádiletsiz dep baǵalady.
Boljam boıynsha, ExxonMobil 2026 jyldyń ekinshi toqsanynda shamamen 14,5 mıllıard AQSh dollary kóleminde paıda tabady. Bul – ótken jyldyń sáıkes kezeńimen salystyrǵanda eki ese kóp. Al Reuters agenttiginiń málimetinshe, Chevron shamamen 12 mıllıard dollar paıda taýyp, sońǵy keminde alty jyldaǵy eń joǵary toqsandyq qarjylyq nátıjege qol jetkizgen.
Munaı kompanııalary tabysynyń ósýi Iran tóńiregindegi áskerı shıelenis aıasynda munaı baǵasynyń barreline 100 AQSh dollarynan joǵary kóterilýimen tuspa-tus keldi. Alaıda qaqtyǵysqa qatysty alańdaýshylyq báseńdegennen keıin munaı baǵasy qaıta tómendeı bastady.
Sonymen qatar Tramp Chevron kompanııasynyń bas dırektory Maık Vırtti munaı salasyn qoldaýda óz ákimshiliginiń rólin atap ótpegeni úshin synǵa aldy. Prezıdenttiń aıtýynsha, Vashıngton qabyldaǵan sheshimderdiń arqasynda kompanııa qyzmet aıasyn keńeıtip, Venesýela naryǵyna qaıta orala alǵan.
Buǵan deıin AQSh prezıdenti Donald Tramp búkil el boıynsha janarmaı quıý stantsııalarynyń ıelerin baǵany tómendetýge shaqyryp, eger tómendetpese, saldary aýyr bolýy múmkin ekenin eskertken bolatyn.
