Tramp: Munaı baǵasynyń ósýi – jahandyq qaýipsizdiktiń tómen baǵadaǵy ótemi
ASTANA. KAZINFORM — AQSh prezıdenti Donald Tramp Taıaý Shyǵystaǵy qaqtyǵys aıasynda munaı baǵasynyń kúrt ósýi ýaqyt óte túzeletinin jáne bul jahandyq qaýipsizdik úshin óteletin shaǵyn ǵana tólem ekenin málimdedi. Bul týraly ol Truth Social áleýmettik jelisinde jazba qaldyrdy.
– Irannyń ıadrolyq qaýpi joıylǵannan keıin tez arada basylatyn munaı baǵasynyń qysqa merzimdi ósýi — AQSh pen búkil álem úshin qaýipsizdik pen beıbitshilikke baǵyttalǵan óte az mólsherdegi tólem, — dep jazdy Donald Tramp.
Demalystan keıingi saýda-sattyqtyń ashylýynda Taıaý Shyǵystaǵy iri energetıkalyq óndirýshilerdiń óndiristi qysqartýynan keıin munaı baǵasy barreline 100 dollardan asty.
Brent markaly munaıdyń baǵasy 18%-ǵa ósip, barreline 108,68 dollarǵa jetti. Al amerıkalyq WTI markaly munaı shamamen 20%-ǵa qymbattap, barreline 108 dollarǵa deıin kóterildi.
Bul 2022 jyldyń aqpan aıynan bergi eń kúrt ósim. Sol kezde, ıaǵnı Reseı Ýkraınaǵa basqynshylyq jasaǵannan keıin de munaı baǵasy barreline 100 dollardan aıtarlyqtaı joǵary kóterilgen edi.
Bul jaǵdaı AQSh pen Izraıldiń Iranmen soǵysyna baılanysty munaı men gaz jetkizýdiń álemdegi eń mańyzdy baǵyttarynyń biri sanalatyn Ormýz buǵazynyń is júzinde jabyq qalýyna baılanysty bolyp otyr.
Aıta keteıik, sarapshylar Ormýz buǵazynda irkilis bes aptaǵa sozylsa, munaıdyń baǵasy barreline 100 dollarǵa jetetinin boljaǵan.
