Tramp mıgranttarǵa qatysty erejeni kúsheıtti

ASTANA. KAZINFORM — AQSh prezıdenti Donald Tramptyń ákimshiligi elge syrttan kelgender men keıbir gýmanıtarlyq baǵdarlamalarǵa qatysýshylarǵa jumys isteýge ruqsat berý erejelerin qataıtatyn jańa saıasatty bekitti. 

Report agenttiginiń málimetinshe, qujattardyń jaramdylyq merzimi burynǵydaı 5 jyl emes, 18 aı bolmaq.

AQSh Azamattyq jáne ımmıgratsııalyq qyzmetiniń (USCIS) komıssary Djozef Edloý bul sheshim ótinish berýshilerge baqylaýdy kúsheıtetinin aıtyp túsindirdi. Ol sheteldikter úshin AQSh-ta jumys isteý quqyq emes, artyqshylyq ekenin eskerýi kerek dep málimdedi.

Edloý bul shara 26 qarashada Vashıngtonda bolǵan oqıǵaǵa jaýap ekenin aıtty. Onda Aýǵanstan týmasy Rahmanýlla Lakanval Aq úı mańynda Ulttyq gvardııa áskerılerine oq jaýdyrǵan bolatyn. Eki adam jaralanyp, bir kúnnen keıin 20 jastaǵy Sara Bekstrom qaıtys boldy. Qazir onyń 24 jastaǵy áriptesiniń jaǵdaıy aýyr.

Aıta keteıik, Tramp Dallastaǵy kisi óltirýden keıin ımmıgratsııalyq saıasatty kúsheıtetini týraly habarlanǵan edi. AQSh prezıdenti Tehas shtatynyń Dallas qalasynda Chandra Mýlı Nagamallaııanyń óltirilýin «sumdyq» qylmys jáne ımmıgratsııalyq qatelikterdiń saldary dep ataǵan bolatyn.