Tramp mıgranttardy qabyldaýdan bas tartqan Kolýmbııaǵa sanktsııa saldy

ASTANA. KAZINFORM — AQSh prezıdenti Donald Tramp Kolýmbııaǵa qarsy birqatar sanktsııa engizdi. Oǵan eldiń mıgranttar mingen AQSh ushaqtaryn qabyldaýdan bas tartýy sebep boldy, dep habarlaıdy VVS. 

Tramp óziniń Truth Social áleýmettik jelisindegi akkaýntynda oǵan «kóptegen zańsyz qylmyskerlerdi tasymaldaǵan AQSh-tan kelgen eki repatrıatsııa ushaǵynyń Kolýmbııaǵa qonbaıtynyn» habarlanǵanyn jazdy. 

Tramptyń aıtýynsha, bul qadam AQSh-tyń ulttyq qaýipsizdigine zııan keltiredi, sondyqtan ol Kolýmbııaǵa qarsy ártúrli sharalardy qoldanýǵa buıryq berdi, sonyń ishinde:

• AQSh-qa kiretin barlyq taýarlarǵa 25% jedel tarıfter; 
• Kolýmbııa úkimetiniń sheneýnikteri men olardyń barlyq odaqtastary men jaqtastary úshin saıahatqa tyıym salý jáne vızalardy dereý joıý; 
• Kolýmbııa úkimetiniń barlyq partııa múshelerine, olardyń otbasy múshelerine jáne jaqtastaryna qarsy vızalyq sanktsııalar.

— Bul sharalar — tek bastamasy, — dep málimdedi Tramp.

Buǵan deıin Tramp AQSh prezıdenti retindegi alǵashqy sózinde ne týraly aıtqanyn jazǵan bolatynbyz. 

Jańa prezıdent óz sózinde ımmıgratsııa men ekonomıkaǵa nazar aýdaratyn «birqatar buıryqqa» qol qoıatynyn jáne «eldiń ońtústik shekarasynda ulttyq tótenshe jaǵdaı» jarııalaıtynyn atap ótti.

Tramp ımmıgratsııalyq saıasattyń kúsheıetinin jáne zańsyz ımmıgranttardy «kelgen jerlerine» deportatsııalaýdy bastaıtynyn jetkizdi.

Tramp bılikke kele sala AQSh-ta jumys isteýge ruqsat beretin mıgratsııalyq qosymshanyń jumysyn toqtatty. 

Sonymen qatar, Tramp ınaýgýratsııadan keıin alǵashqy jarlyqtarǵa qol qoıdy. 

Donald Tramp ókilettiginiń úshinshi kúninde AQSh-tyń ońtústik shekarasyn zańsyz ımmıgranttar úshin jaýyp, olardy deportatsııalaýdy ulǵaıtýǵa baǵyttalǵan jarlyqtardy bekitti.