Tramp Memfıske Ulttyq gvardııa áskerin kirgizý týraly jarlyqqa qol qoıdy
ASTANA. KAZINFORM – AQSh prezıdenti Donald Tramp qylmysqa qarsy kúres maqsatynda Tennessı shtatynyń Memfıs qalasyna Ulttyq gvardııa kúshterin engizý týraly jarlyqqa qol qoıdy. Bul týraly Kazinform-nyń Vashıngtondaǵy arnaýly tilshisi habarlady.
Tramptyń mundaı sheshim qabyldaýy birinshi ret emes. Buǵan deıin ol Vashıngtonda da dál osyndaı shara qabyldaǵan bolatyn, dep jazady NBC News.
Operatsııaǵa Ulttyq gvardııadan bólek, Federaldyq tergeý bıýrosy, alkogol, temeki, atys qarýy men jarylǵysh zattardyń aınalymyn baqylaý bıýrosy, ımmıgratsııalyq jáne keden polıtsııasy, ishki qaýipsizdik mınıstrliginiń tergeý qyzmeti, AQSh marshaldary jáne ózge de federaldy qurylymdar qatyspaq.
Tramp Memfıske qatysty sheshim qabyldaı otyryp, kelesi kezekte Chıkago, Sent-Lýıs qalalaryn, sondaı-aq yqtımal nysan retinde Jańa Orleandy atady.
Alaıda mundaı qadamdar federaldy bılik pen shtattar arasynda daý týyndatýda. Kalıfornııa gýbernatory Gevın Nıýsom Tramp ákimshiligin sotqa berdi. Ol Los-Andjeleste Ulttyq gvardııany paıdalaný zańsyz dep tanylýy keregin talap etti. Bıyl federaldy sýdıa bul sheshimdi zańǵa qaıshy dep tapty. Óıtkeni qoǵamdyq tártipti qorǵaý úshin áskerdi tartýǵa tyıym salynǵan.
Qylmystyq sot tóreligi keńesiniń (SSJ) esebine sáıkes, 2025 jyldyń alǵashqy alty aıynda 2024 jyldyń osy kezeńimen salystyrǵanda AQSh-taǵy qylmys kórsetkishteri aıtarlyqtaı tómendegen. 30 qala boıynsha kisi óltirý derekteri 17%-ǵa (327 jaǵdaıǵa) azaıǵan, aýyr shabýyldar 10%-ǵa qysqarǵan, atys qarýyn qoldaný 21%-ǵa, seksýaldyq zorlyq-zombylyq 10%-ǵa, turmystyq zorlyq 3%-ǵa, tonaý 20%-ǵa, kólik urlyǵy 24%-ǵa, turǵyn úılerdi tonaý 19%-ǵa, basqa ǵımarattarǵa jasalǵan qaraqshylyq 18%-ǵa, dúkenderdegi urlyq 12%-ǵa, ózge de urlyqtar 12%-ǵa azaıǵan.
Halyqaralyq salyq jáne ınvestıtsııa ortalyǵynyń energetıka, ekonomıkalyq ósim jáne qaýipsizdik baǵdarlamasy dırektorynyń orynbasary Ýeslı Aleksandr Hılldyń aıtýynsha, eldegi qylmys deńgeıiniń tómendeýi Ulttyq gvardııanyń engizilýimen baılanysty emes.
– AQSh-ta qylmystyń barlyq túri sońǵy 30 jylda azaıyp keledi. Ulttyq gvardııa qylmys deńgeıine yqpal etpeıdi. Olar quqyq qorǵaý organy emes, polıtseıler sekildi arnaıy daıyndyqtan ótpeıdi. Gvardııashylar tabıǵı apattar kezinde nemese búlik, tótenshe jaǵdaı bolǵanda ǵana qoldanylady. Sondyqtan qylmysty azaıtýda olardyń paıdasy shamaly, – dedi ol.
Sarapshynyń pikirinshe, mundaı qadam Tramptyń bedeline de, jalpy qoǵamnyń qarýly kúshterge degen senimine de keri áser etýi múmkin.
Buǵan deıin federaldy bılik AQSh-tyń birneshe iri qalasynda qylmysker-mıgranttarǵa qarsy operatsııa bastaǵan bolatyn. Bul shara Boston, Chıkago jáne Nıý-Iork bıliginiń narazylyǵyn týdyrdy.
Aıta keteıik, AQSh‑taǵy ımmıgratsııalyq reıdten keıin Ońtústik Koreıaǵa 316 adam oraldy.