Tramp Medvedevtiń málimdemesinen keıin atomdyq súńgýir qaıyqtardy ornalastyrýdy buıyrdy

ASTANA. KAZINFORM — AQSh prezıdenti Donald Tramp Reseı Qaýipsizdik keńesi tóraǵasynyń orynbasary Dmıtrıı Medvedevtiń sózine baılanysty eki atomdyq súńgýir qaıyqty ornalastyrý týraly buıryq berdi.

 — Men bul aqymaq ári arandatýshylyq sıpattaǵy málimdemeler sóz júzinde ǵana qalmaı, naqty áreketke ulasýy múmkin degen qaýippen eki atomdyq súńgýir qaıyqty tıisti aımaqtarǵa ornalastyrýǵa buıryq berdim. Sóz — mańyzdy qural, ol kútpegen saldarǵa alyp kelýi múmkin. Bul joly olaı bolmaıdy dep úmittenemin, — dep jazdy Aq úı basshysy Truth Social paraqshasynda.

Bul rette prezıdent súńgýir qaıyqtar naqty qaıda jiberilgenin naqtylamady.

Buǵan deıin Dmıtrıı Medvedev Tramptyń Reseı men Ýkraına arasyndaǵy qaqtyǵysty retteý merzimine qatysty málimdemesine óte qatqyl jaýap bergen bolatyn.

Osydan keıin Tramp pen Medvedev áleýmettik jelilerde bir-birine qarsy ótkir málimdemeler jasap, ashyq pikirtalasqa tústi.

Aıta keteıik, buǵan deıin AQSh-tyń BUU janyndaǵy ýaqytsha senimdi ókiliniń orynbasary Djon Kellı Donald Tramptyń pikirin jetkizip, Reseı men Ýkraına 8 tamyzǵa deıin beıbit kelisimge kelýi tıis ekenin málimdegen edi.