Tramp medıtsınalyq kómek baǵdarlamasy boıynsha balalardyń jynysyn ózgertýge tyıym saldy
ASTANA. KAZINFORM — AQSh endi kámeletke tolmaǵandarǵa jynysyn ózgertý otalary men gormondyq terapııany qarjylandyrmaıdy, dep habarlaıdy Kazinform.
AQSh prezıdenti Donald Tramp bul týraly Truth Social áleýmettik jelisindegi akkaýntynda jarııalady.
Onyń aıtýynsha, Medicaid memlekettik baǵdarlamasy endi kámeletke tolmaǵandarǵa jynysyn ózgertý maqsatyndaǵy medıtsınalyq protsedýralar shyǵynyn ótemeıdi.
— Biz beıkúná balalarymyzǵa jasalǵan mundaı qatygez ota men protsedýralar úshin aqy tólemeımiz, bul olardyń jas denelerine orasan zııan keltiredi, — dep jazdy Tramp.
Tramp óz ákimshiligi ustanymynyń arqasynda sońǵy bir jarym jylda ondaǵan amerıkalyq aýrýhanalar «genderlik-affırmatıvtik kómek» kórsetýdi toqtatqanyn jáne taǵy kóptegen mekemeniń solaı jasaıdy dep kútiletinin málimdedi.
Medicare jáne Medicaid qyzmet kórsetý ortalyqtary (CMS) balalar men jasóspirimderge jynysty qaıta taǵaıyndaý protsedýralaryn qarjylandyrýdyń toqtatylǵanyn rastady.
— Balanyń jynysyn ózgertýge baǵyttalǵan protsedýralar, sonyń ishinde jynystyq jetilýdi bloktaý, gormondyq terapııa jáne hırýrgııalyq aralasý bedeýlik, jynystyq fýnktsııanyń buzylýy, súıek tini tyǵyzdyǵynyń tómendeýi, mı damýynyń ózgerýi jáne basqa da uzaq merzimdi fızıologııalyq qaıtymsyz saldarǵa ákelýi múmkin, — delingen CMS málimdemesinde.
Tyıym jynystyq jetilýdi bloktaý, gormondyq preparattar jáne hırýrgııalyq otalarǵa qatysty qoldanylady.
Qaýly 13 qazanda kúshine enýi tıis.
Osyǵan deıin AQSh Joǵarǵy Soty transgenderlerge tólqujattaryndaǵy jynysyn ózgertýge tyıym salǵanyn jazdyq.
