Tramp Máskeý men Kıevke beıbitshilik josparyn kelisý úshin arnaıy ókilderin jiberedi
ASTANA. KAZINFORM — AQSh prezıdenti Donald Tramp óziniń arnaıy ókili Stıv Ýıtkoffqa Reseı prezıdenti Vladımır Pýtınmen kelissóz júrgizý úshin Máskeýge barýdy tapsyrǵanyn jáne Armııa mınıstri Den Drıskolldyń Kıevte Ýkraına úkimetiniń ókilderimen kezdesetinin málimdedi. Bul týraly ol Truth Social áleýmettik jelidegi paraqshasynda jarııalady.
Donald Tramptyń aıtýynsha, Reseı men Ýkraına arasyndaǵy soǵysty toqtatý jospary boıynsha jumys ótken aptada eleýli nátıjege qol jetkizdi. AQSh daıyndaǵan 28 tarmaqtan turatyn bastapqy joba eki taraptyń usynysyn eskere otyryp, qaıta qaralǵan. Qazir kelispeýshilik týdyrǵan birneshe tarmaq qarastyrylyp jatyr.
— Ótken aıda 25 myń sarbaz qaza tapty. Biz bul qaqtyǵystyń aıaqtalýyn tezdetýimiz kerek. Túpkilikti kelisimge kelý úmitimen men Stıv Ýıtkoffqa Máskeýde prezıdent Pýtınmen kezdesýdi tapsyrdym, al Den Drıskoll bul jospardy Kıevte talqylaıdy, — dep jazdy Tramp.
Ol Ýıtkoff pen Drıskollǵa tapsyrylǵan mıssııanyń nátıjeleri týraly vıtse-prezıdent Dj.D.Vens, Memlekettik hatshy Marko Rýbıo, Pentagon hatshysy Pıt Hegset jáne Aq úı apparatynyń basshysy Sıýzı Ýaıls jeke esep beretinin atap ótti.
Sondaı-aq Tramp soǵysty toqtatý týraly kelisim jobasy is júzinde aıaqtalǵannan keıin Ýkraına jáne Reseı prezıdentimen jaqyn arada bólek kezdesýler ótkizýge nıetti ekenin atap ótti.
Aıta keteıik, Tramp Ýkraına AQSh-qa «eshqashan alǵys bildirmegenin» aıtty.