Tramp Makron men Rıýttemen aradaǵy jeke jazbalaryn jarııalady
ASTANA.KAZINFORM - Aq úı basshysy Donald Tramp Truth Social áleýmettik jelisindegi akkaýntynda Frantsııa prezıdenti Emmanıýel Makronmen jáne NATO bas hatshysy Mark Rıýttemen jeke habarlamalaryn jarııalady, dep habarlaıdy Kazinform agenttigi.
- Dosym, biz Sırııa boıynsha bir ustanymdamyz. Biz Iranǵa qatysty uly ózgerister jasaı alamyz. Grenlandııaǵa qatysty ne istep jatqanyńdy bilmeımin. Uly isterdi birge jasaýǵa tyrysaıyq, - delingen Makron habarlamasynda.
Habarda frantsýz kóshbasshysy Trampqa qazirgi ýaqytta Shveıtsarııada ótip jatqan Davos ekonomıkalyq forýmynan keıin Parıjde G7 kezdesýin uıymdastyrýdy usynady.
- Men ýkraınalyqtardy, sırııalyqtardy jáne reseılikterdi shaqyra alamyn. Beısenbi kúni Parıjde birge keshki as isheıik, sen AQSh-qa qaıtyp barmas buryn, - delingen Truth Social saıtynda jarııalanǵan habarlamada.
DW málimeti boıynsha, Frantsııa buǵan deıin AQSh-tyń Gaza sektoryndaǵy Palestına-Izraıl qaqtyǵysyn beıbit jolmen sheshýge arnalǵan Tramptyń josparyn júzege asyrýdy baqylaýy tıis «Beıbitshilik keńesine» qosylý týraly usynysyn qabyldamaǵan.
Osydan keıin Tramp frantsýz sharaby men shampanyna 200 paıyzdyq tarıf engizetinin aıtyp qorqytty.
Amerıka kóshbasshysy sonymen qatar NATO Bas hatshysymen jeke hat almasýyn jarııalady, onda Mark Rıýtte Grenlandııa máselesin qozǵaǵan.
- Sizdiń búgin Sırııada qol jetkizgen jetistikterińiz tańǵajaıyp. Men Davostaǵy BAQ-taǵy sózderimdi sizdiń sol jerdegi, Gazadaǵy jáne Ýkraınadaǵy jumysyńyzdy kórsetý úshin paıdalanamyn. Men Grenlandııa máselesiniń sheshimin tabýǵa bel býdym. Sizben kezdesýdi asyǵa kútemin, - delingen Rıýttemen hat almasýda.
Buǵan deıin Tramp Truth Social saıtynda NATO Bas hatshysymen Grenlandııaǵa qatysty telefon arqyly «jaqsy» sóıleskenin málimdegen jazba jarııalaǵan.
- Men Shveıtsarııanyń Davos qalasynda ártúrli taraptardyń kezdesýine kelistim. Men barlyǵyna anyq aıtqanymdaı, Grenlandııa ulttyq jáne jahandyq qaýipsizdik úshin óte mańyzdy. Artqa sheginý joq, bári buǵan kelisedi! Amerıka Qurama Shtattary - planetadaǵy eń qýatty el. Bul meniń birinshi prezıdenttik merzimimdegi áskerı kúshterimizdi qaıta qurýymyzǵa baılanysty. Biz álemdik beıbitshilikti qamtamasyz ete alatyn jalǵyz kúshpiz jáne bul óte qarapaıym túrde kúsh qoldaný arqyly júzege asady!, - dep jazdy Aq úı basshysy.
Mark Rıýtte de, Emmanıýel Makron da áli kúnge deıin elektrondyq poshtalarǵa resmı túrde túsinik bergen joq. Makronnyń aınalasyndaǵylarǵa silteme jasaı otyryp, Reuters jáne AFP agenttikteri Tramp keltirgen Frantsııa prezıdentiniń habarlamasynyń shynaıy ekenin táýelsiz túrde habarlady.
Buǵan deıin Tramptyń 22 qańtarda Davosta «Beıbitshilik keńesiniń» jarǵysyna qol qoıatyny habarlanǵan bolatyn.