Tramp: Madýronyń Venesýella prezıdenti retinde sanaýly kúnderi qaldy

ASTANA. KAZINFORM - Donald Tramp AQSh pen Venesýela arasynda soǵys bolýy ekitalaı ekenin jáne Nıkolas Madýronyń bul eldiń basshysy retinde sanaýly kúnderi qalǵanyn aıtty. Bul týraly AQSh Prezıdenti CBS-tiń «60 mınýt» baǵdarlamasyna bergen suhbatynda málimdedi, dep habarlaıdy DW.

Tramp suhbatynda Madýronyń «jaqyn arada taqtan túsedi» degen oımen kelisetinin aıtty.

«Solaı der edim jáne solaı oılaımyn», - dedi ol.

AQSh-tyń áskerı kemeleri 2025 jylǵy qyrkúıek aıynyń basynan venesýelalyq esirtki kartelderimen baılanysy bar halyqaralyq sý aıdynyndaǵy kemelerge birneshe ret soqqy berdi. Sonymen qatar, AQSh Venesýela jaǵalaýynda áskerı kemelerdiń shaǵyn tobyn jáne Pýerto-Rıkoda joıǵysh ushaqtardy ornalastyrdy. Ony Tramp esirtki saýdasymen kúres úshin jasalǵan shara dep túsindirdi. Alaıda Venesýela prezıdenti Nıkolas Madýro Trampty «syltaý oılap taýyp, soǵys bastamaq» dep aıyptady.

Esterińizge sala keteıik, qazan aıynyń sońynda AQSh Venesýelaǵa iri ushaq tasymaldaǵyshyn jiberdi. AQSh Qorǵanys mınıstrliginiń habarlaýynsha, ol «Prezıdenttiń transulttyq qylmystyq uıymdardy joıý jáne esirtki terrorızmine qarsy is-qımyl bastamasyn qoldaýǵa» baǵyttalǵan.

Venesýelanyń Qazaqstandaǵy elshisi Kazinform agenttigine bergen eksklıýzıvti suhbatynda AQSh áskerı-teńiz kúshteri shabýyldaǵan kemeler esirtki kartelderimen baılanysty emes ekenin málimdedi.

Kýba prezıdenti Mıgel Dıas-Kanel X áleýmettik jelisindegi jazbasynda AQSh-ty synǵa alyp, Madýrony qoldady.