Tramp kvartaldyq esepti alyp tastaýdy usyndy: bul álemdik naryq pen Qazaqstanǵa qalaı áser etedi

ASTANA. KAZINFORM – AQSh prezıdenti Donald Tramp amerıkalyq kompanııalarǵa toqsan saıynǵy kiris esebin jarııalaýdy toqtatyp, qarjylyq esepti jylyna eki ret tapsyrýdy usyndy. Bul týraly Kazinform tilshisi habarlady.

Truth Social platformasynda jarııalanǵan úndeýinde Tramp toqsan saıynǵy esep berý júıesi kompanııa basshylyǵyn uzaqmerzimdi josparlaýda alańdatyp, qosymsha shyǵynǵa ákeletinin jáne paıda tek Ýoll-strıttegi taldaýshylarǵa tıetinin aıtty. Onyń pikirinshe, jartyjyldyq esep kompanııalarǵa ınnovatsııa men ósimge shoǵyrlanýǵa kóbirek múmkindik beredi.

– Qytaıda kompanııalardy basqarýda 50-100 jyldyq strategııalyq josparlaý qoldanylady. Al biz kompanııalarymyzdy toqsandyq kórsetkishter negizinde basqaramyz. Bul – durys emes! – dedi Donald Tramp.

Bul nege mańyzdy?

Qazirgi tańda AQSh-taǵy jarııa kompanııalar Qundy qaǵazdar jáne bırja jónindegi komıssııasynyń (SEC) talaby boıynsha toqsan saıyn qarjylyq esep usynýǵa mindetti. Bul qujattar ınvestorlar úshin negizgi baǵdar sanalady. Máselen, jaqynda Oracle kompanııasynyń toqsandyq esebi jarııalanǵannan keıin aktsııalary kúrt qymbattap, onyń negizin qalaýshy Larrı Ellıson bir kúnde álemdegi eń baı adamǵa aınalǵan edi.

Tramptyń bastamasy júzege assa, álemdegi eń iri ekonomıka qarjylyq aqparatty ashýdyń túbegeıli jańa tártibine kóshedi. Bul ınvestorlar úshin turaqty kórsetkishterdiń azaıýyna jáne kútpegen jaǵdaılar týyndaǵanda naryqtaǵy qubylmalylyqtyń kúsheıýine alyp kelýi múmkin.

Álemge áseri

AQSh-ta qabyldanǵan tájirıbeler jahandyq standarttarǵa da yqpal etedi. Eýropada, sonyń ishinde EO men Ulybrıtanııada bırjadaǵy kompanııalar ádette jylyna eki ret esep beredi. Qytaıda da toqsandyq esep bar, biraq korporatıvtik basqarý uzaqmerzimdi ulttyq strategııalarǵa negizdelgen.

Tramptyń Qytaıdy mysalǵa keltirýi AQSh pen QHR arasyndaǵy básekelestiktiń jańa qyryn kórsetedi, endi tek tehnologııa men saýdada ǵana emes, korporatıvtik basqarý men qarjylyq mádenıette de aıyrmashylyqtar aıqyndala bastady.

Ideıanyń jaqtaýshylary ákimshilik júktemeniń azaıatynyn aıtsa, qarsy tarap ınvestorlar úshin táýekelder artyp, kútpegen jańalyqtar kezinde naryqtaǵy kúızelister kúsheıe túsetinin eskertedi.

Qazaqstanǵa yqpaly qandaı?

Qazaqstan úshin bul bastamanyń áseri janama bolǵanymen, mańyzdy ekenin moıyndaýymyz kerek. Sheteldik ınvestorlar damýshy naryqtardy kóbine AQSh-taǵy talaptarmen salystyrady. Eger Vashıngtonda ashyqtyq talaptary jeńildetilse, bul basqa elderdegi boljamdarǵa da yqpal etýi múmkin.

Sonymen birge Qazaqstan úshin bul múmkindik bolýy yqtımal. Ashyqtyq pen boljamdylyqty saqtaı otyryp, el ózin turaqtylyq pen senimge negizdelgen naryq retinde tanystyra alady. Bul uzaqmerzimdi kapıtaldy tartýǵa jáne jahandyq qarjy júıesindegi ornyn nyǵaıtýǵa strategııalyq basymdyq bermek.

Eske salaıyq, buǵan deıinTramp The New York Times gazetin jala japty dep sotqa berdi.