Tramp Kýbanyń jaqyn arada qulaıtynyn aıtty

ASTANA. KAZINFORM - AQSh prezıdenti Donald Tramp biraz ýaqyttan beri ekonomıkalyq sanktsııalardy kúsheıtip otyrǵan Kýba «jaqyn arada qulaıdy» dep málimdedi.

Bul týraly Anadoly habarlady.

Tramp Kýbaǵa qatysty jańa málimdemesin amerıkalyq CNN telearnasyna bergen telefon arqyly suhbatynda aıtty.

Ekinshi prezıdenttik merzimindegi jetistikterin atap ótken Tramp:

— Kýba da jaqyn arada qulaıdy. Olar kelisimge kelýge yntaly, — dedi.

Onyń aıtýynsha, Kýbamen kelissóz júrgizý úshin AQSh memlekettik hatshysy Marco Rubio tartylmaq. Tramp qazir bul máselege erekshe nazar aýdarylyp otyrǵanyn jetkizdi.

— Men bul sátti 50 jyl kúttim. Endi Kýba meniń qolyma tústi, — dedi ol, bul baǵytta aıtarlyqtaı ilgerileý bar ekenin atap ótip.

Bir kún buryn White House-da jasaǵan málimdemesinde AQSh prezıdenti amerıkalyq kýbalyqtardyń otanyna oralýy «bir sáttik is» ekenin aıtqan.

Tramp Iranǵa jasalǵan shabýyldardy sátti ótti dep baǵalap, Tegeran bıligi berilýi múmkin degen pikir bildirgennen keıin:

— Kýba da qulaıdy, — dep málimdedi.

AQSh-tyń Kýbaǵa munaı blokadasy

30 qańtarda Tramp Kýbaǵa munaı satatyn nemese jetkizetin elderden keletin barlyq taýarǵa kedendik baj engizýdi kózdeıtin prezıdenttik jarlyqqa qol qoıdy.

Aq úı bul sheshim AQSh-tyń ulttyq qaýipsizdigi men syrtqy saıası múddelerin Kýbanyń zııandy áreketteri men saıasatyna qarsy baǵyttalǵanyn málimdedi.

1 aqpanda Tramp Kýba úkimetimen munaı jetkizý máselesi boıynsha kelissóz bastalǵanyn habarlaǵan. Alaıda Kýba tarapy bul aqparatty joqqa shyǵardy.

Osǵan deıin Tramp Kýbadan tóngen qaýipke baılanysty AQSh-ta tótenshe jaǵdaı jarııalaǵany týraly jazdyq.