Tramp krıptovalıýta bırjasynyń negizin qalaýshyǵa keshirim berdi

ASTANA. KAZINFORM — AQSh prezıdenti Donald Tramp Binance krıptovalıýta bırjasynyń negizin qalaýshy Chanpen Chjaony keshirdi, dep habarlaıdy agenttiktiń menshikti tilshisi. 

Qytaıdan shyqqan kanadalyq mıllıarder 2023 jyldyń qarashasynda bırjanyń bas dırektory qyzmetin atqaryp júrip, aqshany jylystatýǵa kómekteskenin moıyndady. 2024 jyldyń sáýirinde úkim shyǵarylǵannan keıin Chjao 4 aı túrmede jazasyn ótep, 50 mıllıon dollar aıyppul tóledi. Al kompanııaǵa 3,4 mıllıard dollar aıyppul salynyp, oǵan AQSh-ta jumys isteýge tyıym salyndy. Chanpen Chjao byltyr qyrkúıek aıynda bosatyldy.

— Prezıdent Tramp óziniń konstıtýtsııalyq ókilettigin paıdalanyp, Baıden ákimshiligi krıptovalıýtaǵa qarsy soǵysynyń bir bóligi retinde nysanaǵa alǵan Chanpen Chjaony keshirdi, — dedi Aq úıdiń baspasóz hatshysy Kerolaın Lıvıtt.

Aq úı Baıden ákimshiligi krıptovalıýta ındýstrııasyn tyıý úshin Chjaony jazalady dep sanaıdy. Al shyn máninde eshkim alaıaqtyq jasady dep onyń atyna shaǵym túsirmegen, naqty japa shegýshiler de bolmaǵan.  

Forbes málimetinshe, Chanpen Chjaonyń baılyǵy — shamamen 86 mıllıard dollar. 2017 jyly Binance negizin qalaǵan Chjao áli de bırjanyń basym bóligin ıelenedi. Tramptyń keshirimi Binance-qa AQSh naryǵyna oralýǵa múmkindik beredi.

Chanpen Chjao men Binance Tramp otbasynyń krıptovalıýta ındýstrııasyna salǵan ınvestıtsııasymen de baılanysty. Tramptyń uldary Erık pen kishi Donald byltyr World Liberty Financial kompanııasyn qurdy.

Aıta keteıik, osyǵan deıin Tramptyń Qytaımen saýda qaqtyǵysy týraly málimdemesi krıptovalıýta naryǵyn qulatqan bolatyn.