AQSh Qorǵanys mınıstrliginiń ataýy ózgerdi

ASTANA. KAZINFORM — AQSh prezıdenti Donald Tramp Qorǵanys mınıstrligin Áskerı mınıstrlik dep qaıta ataý týraly jarlyqqa qol qoıdy, dep habarlaıdy TASS.

Tramp Qorǵanys mınıstrligin «Áskerı mınıstrlik» (Department of War) dep qaıta ataý týraly sheshim shyǵardy.

— Meniń oıymsha, bul qazirgi álem ahýalyn eskere otyryp, áldeqaıda oryndy ataý, — dedi Tramp Aq úıde jýrnalıstermen kezdesýi kezinde jarlyqqa qol qoıý aldynda. 

Onyń aıtýynsha, Pentagon ataýyn ózgertý máselesi birneshe aı boıy talqylanǵan.

Óz kezeginde Tramp «áskerı mınıstr» dep ataǵan Pentagon basshysy Pıt Hegset Qorǵanys mınıstrligi bolyp ózgergen kezden beri (20-ǵasyrdyń ortasy) AQSh birde-bir iri soǵysta jeńiske jetpegenin aıtty. Onyń pikirinshe, burynǵy ataýǵa oralý vedomstvoǵa «naqty ári sheshimdi kúres júrgizýge» múmkindik berip, «bitpeıtin qaqtyǵystardyń» aldyn alýǵa sep bolady.

— Bul vedomstvo endi jeńilip qalmaý úshin emes, jeńis úshin soǵysady, — dedi Hegset.

Aıta keteıik, AQSh-ta Áskerı mınıstrlik 1789 jyldan 1947 jylǵa deıin bolǵan. 1947 jyly ol Ulttyq áskerı vedomstvoǵa aınalyp, al 1949 jyly Qorǵanys mınıstrligi dep qaıta atalǵan.

Osydan buryn Tramp 2026 jyly Maıamı qalasynda G20 sammıti ótetinin málim etti.