Tramp Kongreste ınflıatsııamen kúres josparyn jarııalady

ASTANA.KAZINFORM – Donald Tramp óziniń sózinde basty basymdyqtarynyń biri AQSh ekonomıkasyn qutqarý, jumys isteıtin otbasylarǵa jedel ári qomaqty kómek kórsetý ekenin atap ótti, dep habarlaıdy Kazinform tilshisi KDH News -ke silteme jasap.

Ol burynǵy ákimshilikten apatty jaǵdaıdaǵy ekonomıka, alapat ınflıatsııa qalǵanyn aıtty. Baıden ákimshiliginiń saıasaty energotasymaldaýshylarǵa baǵany ósirip, azyq-túlik pen tamaqqa degen shyǵyndy kóbeıtti. Sondaı-aq birinshi kezekte qajetti zattardy mıllılondaǵan amerıkalyqtar úshin qoljetimsiz etti. AQSh 48 jyl ishinde, tipti el ómirinde dese de bolady - eń kúshti ınflıatsııany bastan ótkerdi.

Tramp prezıdent retinde osy shyǵyndardy joıyp, Amerıkany baıaǵydaı qoljetimdi etýge kúnde kúsh salyp jatqanyn aıtty.

Qazir ınflıatsııamen kúreste basty nazar energııanyń baǵasyn kúrt túsirýge aýdarylyp otyr. Bizge deıingi ákimshilik jańa munaı jáne gaz arendalaryn 95% qysqartyp, qubyr jelileriniń qurylysyn barynsha baıaýlatqan, sondaı-aq 100-den astam elektr stansalaryn jaýyp tastaǵan.

- Biz qazir osy stansalardyń kópshiligin ashyp jatyryz, - dedi AQSh prezıdenti.

Tramp prezıdenttik qyzmettiń birinshi kúni «Burǵyla jáne burǵyla» degen uranmen kómirtegilerdi óndirý jóninde jarlyq shyǵarǵanyn atap ótti.

Tramp ákimshiligi Alıaskadaǵy alyp gaz qubyrymen de jumys istep jatyr. Ol Japonııa, Ońtústik Koreıa syndy ózge de elderdiń árqaısysy trıllıondaǵan dollar ınvestıtsııa quıyp, amerıkanyń seriktesi bolǵysy keletin álemdegi eń iri nysandardyń biri. Barlyǵy da iske qosýǵa daıyn. Ruqsat alyndy, endi Tramp osy aptanyń sońynda AQSh-ta asa qajetti mıneraldar men sırek kezdesetin metall óndirisin kúrt keńeıtý baǵytynda tarıhı shara qabyldaıdy.

AQSh ınflıatsııamen odan ári kúresý baǵytynda energııa baǵasyn túsirip qana qoımaı, salyq tóleýshilerdiń aqshasyn betaldy shashýdy toqtatady.

Tramp bul maqsat úshin úkimetten tıimdilik departamentin (DOGE) qurǵanyn aıta ketti jáne onyń jetekshisi Ilon Maskke atqarǵan aýqymdy jumysy úshin alǵys bildirdi.

Inflıatsııany jeńý úshin Tramp ákimshiligi ıpoteka boıynsha stavkalardy azaıtpaq. Sondaı-aq avtonesıe úshin tólemderdi jáne azyq-túlik baǵasyn túsiredi. Qart adamdardy qorǵaýǵa qajetti sharalardy qolǵa alyp, amerıkalyq otbasylarǵa qomaqty qarjy bóledi.

Osy baǵyttaǵy taǵy bir sharanyń biri jaqynda 5 mln dollarǵa satyla bastaıtyn «Altyn karta» bolady. Olar AQSh-qa salyq tólep, jumys oryndaryn ashatyn baqýatty adamdarǵa beriledi.

Tramp josparynyń kelesi kezeńi Kongress qabyldaıtyn barshaǵa arnalǵan salyq jeńildikterimen baılanysty tarıhı ekonomıkany qurý bolyp tabylady.

Tramp baj salyǵyn salýdy, keı jaǵdaıda mol kólemde salýdy ýáde etti.

- Ózge elder ondaǵan jyldar boıy baj salyǵyn bizge qarsy qoldandy, endi olardy ózge elderge biz salamyz. Eýropalyq Odaq, Qytaı, Brazılııa, Úndistan, Meksıka, Kanada men ózge de kóptegen elder bizdikimen salystyrǵanda shekten tys joǵary salyq alady. Bul - ádiletsiz. Úndistan bizden kólik salyǵyn 100% paıyzdan joǵary alady. Qytaıdyń ónimderge ortasha tarıfi bizdikinen eki ese kóp. Al Ońtústik Koreıanyń ortasha tarıfi tórt ese joǵary. Sonymen birge biz Ońtústik Koreıaǵa áskerı jáne basqa da kómekter kórsetemiz, - dep málimdedi Tramp.

2 sáýirde ózara baj salyǵy kúshine enedi. Tarıfter Amerıkaǵa jetkiziletin aýyl sharýashylyǵy ónimderine júredi. «Tarıfter Amerıkany qaıtadan baı ári uly etedi».

AQSh budan bylaı Kanada men Meksıkaǵa júzdegen mıllıon dollarǵa sýbsıdııa bermeıdi.

Tramp kommertsııalyq jáne áskerı keme qurylysyn qosa alǵanda amerıkalyq keme qurastyrý ónerkásibin jandandyratynyn málimdedi.

Osy maqsat úshin ol Aq úıde keme qurylysynyń jańa keńsesi qurylatynyn aıtyp, osy salany Amerıkaǵa qaıtarý úshin arnaıy salyq jeńildikterin usyndy.

Osyǵan deıin Tramp Kongrestiń birlesken otyrysynda ne týraly aıtqanyn jazdyq.