Tramp Kongresti úkimetti ýaqytsha qarjylandyrý týraly zań jobasyn qoldaýǵa shaqyrdy
ASTANA. KAZINFORM – AQSh úkimetin qyrkúıek aıynyń sońyna deıin qazirgi deńgeıde qarjylandyrýdy qamtamasyz etetin bul zań jobasyn Ókilder palatasyna respýblıkalyq kópshilik kóshbasshylary usyndy, dep habarlaıdy «Amerıka daýysy».
AQSh prezıdenti Donald Tramp respýblıkalyq partııa kóshbasshylary usynǵan úkimetti ýaqytsha qarjylandyrý týraly zań jobasyn quptap, barlyq kongressmendi ony qoldaýǵa shaqyrdy.
Bul týraly ol Truth Social áleýmettik jelisinde jazdy.
Senbi kúni buryn Ókilder palatasyndaǵy respýblıkashyl kóshbasshylar AQSh úkimetin qyrkúıek aıynyń sońyna deıin qazirgi deńgeıde qarjylandyrýdy kózdeıtin ýaqytsha qarjylandyrý týraly zań jobasyn usyndy.
Respýblıkashyl partııa basshylarynyń aıtýynsha, 99 betten turatyn zań jobasy qorǵanys shyǵyndaryn shamamen 6 mıllıard dollarǵa arttyrady, bul 2024 qarjy jylymen salystyrǵanda kóbirek. Al qorǵanysqa qatysy joq shyǵyndar shamamen 13 mıllıard dollarǵa qysqarady. Sonymen qatar ardagerlerdiń densaýlyǵyn qamtamasyz etýge qosymsha 6 mıllıard dollar bólinedi.
Zań jobasynda qosymsha qarjylyq «erekshelikter» de qarastyrylǵan, sonyń ishinde AQSh-tyń Іshki kirister qyzmetin (IRS) qarjylandyrýdy 20 mıllıard dollarǵa qysqartý jáne Immıgratsııa jáne keden polıtsııasynyń (ICE) deportatsııalaý operatsııalaryna qarjy bólýdi ulǵaıtý.
Respýblıkashyl partııa kóshbasshylary zań jobasynyń Aq úımen naqty kelisilgenin málimdedi. Qujattaǵy qarjylandyrý deńgeıleri 2023 jylǵy ekijaqty qarjylandyrý kelisiminde belgilengen kórsetkishterden tómen.
Demokrattar bul usynysty qoldamaıdy, sondyqtan respýblıkashyldarǵa ony ótkizý úshin derlik biraýyzdan qoldaý qajet. Ókilder palatasynyń spıkeri Maık Djonsonnyń 218-214 esebindegi álsiz kópshiligimen qatelikke jol berýge múmkindigi az. Eger Ókilder palatasynyń barlyq múshesi daýys berýge qatyssa, ol tek bir kongressmenniń daýysyn joǵaltýǵa ǵana múmkindik bere alady.
Buǵan deıin Donald Tramp Ilon Mask pen mınıstrler kabıneti arasyndaǵy qarym-qatynasty retteýge tyrysqany týraly habarlanǵan edi. Úkimet tıimdiligi departamentiniń basshysy mınıstrlikterdiń jumysyna aralasýy saldarynan kabınet ishinde alaýyzdyq kúsheıip keledi.
Aıta ketelik Tramp AQSh pen Kanada arasyndaǵy shekaralyq kelisimdi qaıta qaraýǵa nıetti.