Tramp kompıýterlik chıpter men dári-dármekterge baj salyǵyn engizbekshi

ASTANA. KAZINFORM — Tramp ákimshiligi chıpter men farmatsevtıkalyq ónimderdiń ımportyna qatysty tergeý júrgizýdi bastady. Bul jańa tarıfterdiń engizilýine ákelýi múmkin, dep habarlaıdy Kazinform agenttiginiń menshikti tilshisi The New York Times basylymyna silteme jasap.

Ulttyq qaýipsizdik týraly zańǵa súıene otyryp, tergeý jartylaı ótkizgishterdi óndirýge arnalǵan jabdyqtardy, mıkroshemalar elementterin jáne farmatsevtıkalyq ıngredıentterdi de qamtıdy. 

Aq úıdiń habarlaýynsha, prezıdent «ulttyq jáne ekonomıkalyq qaýipsizdik úshin sheshýshi mańyzy bar óndiristerdi elge qaıtarýdyń mańyzdylyǵyn burynnan aıtyp keledi».

Farmatsevtıkaǵa qatysty Donald Tramp kóptegen mańyzdy dári-dármekterdiń shetelden ákelinetinin aıtyp, «biz endi óz dárimizdi ózimiz óndirmeımiz» degen pikir bildirgen. Jańa baj salyǵy jartylaı ótkizgishter men farmatsevtıkalyq ónimderge 1962 jylǵy Saýdany keńeıtý týraly Zańnyń 232-bólimine sáıkes engiziledi. Bul zań prezıdentke ulttyq qaýipsizdikti qorǵaý maqsatynda tarıfter engizýge múmkindik beredi.

Buǵan deıin AQSh elektronıkaǵa salynatyn baj salyǵyn ýaqytsha alyp tastap, jańa tarıfterdi daıyndap jatqanyn jazǵan bolatynbyz.