Tramp kompanııasy Grýzııada eń bıik záýlim ǵımarat salady
ASTANA. KAZINFORM — Grýzııa astanasynda eldegi eń bıik ǵımarat bolatyn Trump Tower Tbilisi kópfýnktsıonaldy kesheniniń qurylysy josparlanyp otyr, dep habarlaıdy Birinshi habar taratý arnasy.
AQSh prezıdenti Donald Tramp otbasynyń kompanııasy The Trump Organization-nyń habarlaýynsha, jobada shamamen 70 qabatty záýlim ǵımarat qurylysy qarastyrylǵan. Sáýlet tujyrymdamasyn Gensler halyqaralyq kompanııasy ázirlegen.
Atap ótilgendeı, keshen kópfýnktsıonaldy bolady jáne oǵan joǵary deńgeıli turǵyn úıler, saýda alańdary, meıramhanalar jáne qyzmet kórsetý nysandary kiredi. Ornalasqan jerine baılanysty ǵımarat Tbılısıdiń damyp kele jatqan iskerlik jáne qoǵamdyq keńistiginiń negizgi elementine aınalmaq.
The Trump Organization atqarýshy vıtse-prezıdenti Erık Tramptyń atap ótýinshe, joba kompanııanyń standarttaryna sáıkes júzege asyrylady.
Joba Archi Group, Biograpi Living, Blox Group, Finvest Georgia jáne The Sapir Organization sııaqty birneshe kompanııanyń qatysýymen júzege asyrylyp otyr.
Joba týraly qosymsha málimet, sonyń ishinde merzimderi men sáýlet sheshimderi keıinirek jarııalanady dep josparlanǵan.
Aqpan aıynda Tramp uıymy quny 1 mlrd dollar joba aıasynda Aýstralııada alǵashqy munarasyn salý týraly kelisimge qol qoıdy.
Eske sala ketsek, 2025 jyldyń jeltoqsanynda Grýzııa úkimeti Tbılısıdegi Arsenalı tóbesinde úlken ákimshilik qala salý jobasyn jarııalady.
Grýzııa bıligi buǵan deıin Tbılısıdiń jańa halyqaralyq áýejaıynyń qurylysy bastalǵanyn habarlaǵan bolatyn. Sonymen qatar, bıyl elde quny 300 mln AQSh dollaryna baǵalanǵan Grýzııa tarıhyndaǵy eń iri sporttyq nysannyń salynatyny týraly jarııalanǵan edi.
