Tramp komandasy 120 kúnde AQSh-tyń jasandy ıntellekt saıasatyn aıqyndaıdy
ASTANA. KAZINFORM — AQSh prezıdenti Donald Tramptyń jasandy ıntellekt jónindegi komandasy 120 kún ishinde tehnologııanyń táýekelderi men múmkindikteri týraly baıandama daıyndap, sondaı-aq jasandy ıntellektini retteýdegi úkimettiń rólin aıqyndaıdy, dep habarlaıdy Kazinform agenttigi Anadolu-ǵa silteme jasap.
The Wall Street Journal (WSJ) gazetiniń habarlaýynsha, «Sýperıntellekt kúshterin» (Super Intelligence Force) Ulttyq barlaý dırektory Djeı Kleıton basqarady. Prezıdent ákimshiliginde ol is júzinde jasandy ıntellekt máseleleri boıynsha bas úılestirýshi («patsha») qyzmetin atqaryp otyr.
WSJ-ge bergen suhbatynda Kleıton ákimshilik ІT ındýstrııasyna «joǵarydan» qatań talaptar qoıýdy josparlap otyrmaǵynyn ekenin aıtty. Onyń ornyna baqylaý tetikteri memleket pen bıznes arasyndaǵy turaqty dıalog arqyly ázirlenbek.
Aqparattan habardar derekkózderdiń málimetinshe, jumys toby ózin-ózi retteý tujyrymdamasyna jáne táýekelderdi basqarý boıynsha negizgi ókilettikterdi ІT salasynyń ózine berýge basymdyq tanytady.
Kólemdi memlekettik retteýshi organ qurýdyń nemese qatań lıtsenzııalaý júıesin engizýdiń ornyna, Aq úı jasandy ıntellekt modelderin baqylaý men testileý fýnktsııalaryn jetekshi tehnologııalyq kompanııalarǵa, ázirleýshilerge jáne salalyq konsortsıýmdarǵa berýdi josparlap otyr.
«Sýperıntellekt kúshteriniń» jarǵysynda komanda «sýperıntellektke» (SI) baılanysty qaýipterge den qoıý josparlaryn ázirleıtini jáne ınnovatsııalar men básekelestikke kedergi keltirýi múmkin «shamadan tys retteýge» jol bermeıtini kórsetilgen.
«Sýperıntellekt kúshteriniń» jarǵysynda memlekettiń qoldanystaǵy quraldaryn tıimdi paıdalaný qajettigine basa mán berilip, AQSh-tyń kóshbasshylyǵyn saqtaý basty basymdyq retinde aıqyndalǵan.
Djeı Kleıtonnyń komandasy tehnologııalyq kompanııalar men asa mańyzdy ınfraqurylym operatorlary qazirgi ýaqytta SI-ǵa baılanysty kıbershabýyldar, júıelik aqaýlar men derekterdiń taralyp ketýi týraly aqparatty qalaı beretinin egjeı-tegjeıli zertteıdi. Maqsat — bıýrokratııalyq kidiristerdi joıý jáne shtattan tys jaǵdaılar týraly arnaıy qyzmetter men tıisti vedomstvolardyń jedel habardar bolýyn qamtamasyz etý.
Jańa shekteý engizetin zańdar qabyldaýdyń ornyna jumys toby ınfraqurylymdy qorǵaý úshin federaldyq agenttikterdiń qoldanystaǵy ókilettikterin qalaı paıdalanýǵa bolatyny jóninde usynymdar ázirleıdi.
«Birinshi oryndy saqtap qalý» ıdeıasy tek bedel máselesi emes, sonymen qatar qorǵanys sıpatynda. Top basshysy Djeı Kleıton The Wall Street Journal-ǵa bergen suhbatynda geosaıası básekelesterden artta qalý ulttyq qaýipsizdikke tónetin táýekelderdi birneshe ese arttyratynyn málimdedi.
AQSh prezıdenti Donald Tramp 19 qyrkúıekte eldiń jasandy ıntellekt salasyndaǵy básekede birinshi oryndy saqtaý úshin arnaıy komanda qurylatynyn jáne onyń basshysy — «jasandy ıntellekt patshasy» taǵaıyndalatynyn jarııalady.
30 qyrkúıekte Tramp «jasandy ıntellekt» (AI) termıniniń ornyna «sýperıntellekt» (SI) termınin qoldanýdy kózdeıtin jarlyqqa qol qoıdy.
