Tramp Kolýmbııa, Meksıka jáne Kýbaǵa eskertý jasady

ASTANA. KAZINFORM — Aq úı basshysy Donald Tramp Kolýmbııa prezıdenti Gýstavo Petroǵa qatań eskertý jasap, «kokaın óndirip, ony AQSh-qa satatyn ýaqyty az qalǵanyn» málimdedi, dep habarlaıdy Kazinform. 

Politico basylymynyń  habarlaýynsha, AQSh prezıdenti Kolýmbııaǵa qarsy AQSh-tyń áskerı operatsııasy týraly suraqqa: «Meniń oıymsha, bul jaqsy estiledi», — dep jaýap berdi. 

Tramp prezıdenttik ushaq bortynda tilshilerge Kolýmbııany «kokaın óndirip, ony Qurama Shtattarǵa satýdy unatatyn aýrý adam» basqaryp júrgenin málimdedi. 

— Ol muny uzaq ýaqyt boıy istemeıdi. Maǵan senińiz, — dedi amerıkalyq kóshbasshy Petro týraly.

Bul málimdemeler Kolýmbııa kóshbasshysy tarapynan qatty synǵa ushyrady, ol Trampty «jala jabýdy toqtatýǵa» shaqyryp, Latyn Amerıkasy elderin birigýge shaqyrdy.

Tramp sonymen qatar Kýba úkimeti jaqyn arada kúıreýi múmkin ekenin aıtyp, Kýbaǵa amerıkalyq áskerı aralasýdyń qajeti joq ekenin qosyp ótti. 

— Kýba qulaýǵa jaqyn. Kýbanyń qazir tabysy joq. Olar barlyq tabysyn Venesýeladan, Venesýela munaıynan alǵan. Endi olar eshteńe almaı otyr. Kýba kúıreýdiń az-aq aldynda, — dedi ol.

Aq úıdiń basshysy sondaı-aq Meksıkaǵa ol arqyly esirtki aǵyny júrip jatqandyqtan eldiń «óz-ózin qolǵa alýy» kerektigin eskertti.

Tramp Meksıka prezıdenti Klaýdııa Sheınbaýmdy «keremet adam» dep atap, onymen sóılesken saıyn Meksıkaǵa amerıkalyq ásker jiberýdi usynǵanyn málimdedi. 

— Meksıka úkimeti bul máseleni sheshýge qabiletti, biraq ókinishke qaraı, Meksıkadaǵy kartelder óte kúshti, — dep qosty ol.

Buǵan deıin Danııa premer-mınıstri Tramp ákimshiligin Grenlandııaǵa qarsy «ses kórsetýin toqtatýǵa» shaqyrǵanyn jazǵan bolatynbyz. 

Sondaı-aq AQSh prezıdenti Donald Tramp The Atlantic basylymyna bergen suhbatynda Venesýelanyń ýaqytsha basshysy Delsı Rodrıgeske «eger durys áreket jasamasa, onyń ótemi Madýronikinen de joǵary bolýy múmkin» degen qatań eskertý jasaǵanyn jazdyq.