Tramp Qytaımen baj salyǵyn uzartý týraly sońǵy sheshimdi qabyldaıdy

ASTANA. KAZINFORM — AQSh pen Qytaı sheneýnikteri Stokgolmdegi eki kúndik kelissózden keıin seısenbi kúni eki jaq syndarly dep baǵalaǵan 90 kúndik saýda bitiminiń merzimin uzartý týraly kelisti, dep habarlaıdy Reuters. 

Kelissóz jahandyq ekonomıkalyq ósimge qaýip tóndiretin álemniń eki iri ekonomıkasy arasyndaǵy shıelenisti azaıtýǵa baǵyttalǵan.

Úlken jetistikter týraly habarlanbaǵanymen, AQSh ókilderi 12 tamyzda aıaqtalatyn ýaqytsha kelisimdi uzartý týraly sheshimdi prezıdent Donald Tramp qabyldaıtynyn atap ótti. Áıtpese, tarıfter qaıtadan úsh tańbaly deńgeıge kóterilýi múmkin. Alaıda AQSh qarjy mınıstri Skott Bessent Tramptyń ýaqytsha kelisimdi uzartýdan bas tartýy týraly boljamdardy joqqa shyǵardy.

— Kezdesýler óte syndarly ótti. Biraq biz áli kelisim bergen joqpyz, — dedi Bessent tilshilerge.

Aılar boıy joǵary tarıftermen qorqytqannan keıin Tramp EO, Japonııa, Indonezııa jáne basqa eldermen saýda kelisimderin jasady. 

Bessenttiń málimdeýinshe, ol Tramppen sársenbi kúni kezdesýdi kútedi jáne prezıdent bitimdi uzartý týraly sońǵy sheshimdi qabyldaıdy.

Ol sondaı-aq 90 kúnnen keıin Amerıka men Qytaı ókilderiniń taǵy bir kezdesýi bolýy múmkin ekenin habarlady.

Eske sala ketsek, mamyr aıynda Qytaı taýarlarynyń AQSh-qa ımporty úshin baj salyǵy 115 paıyzdan 30 paıyzǵa deıin, amerıkalyq taýarlardyń Qytaıǵa ımporty 10 paıyzǵa ózara tómendetilgeni týraly habarlanǵan bolatyn.

Buǵan deıin AQSh Qytaıdyń keıbir taýaryna baj salyǵyn 31 tamyzǵa deıin toqtatqanyn jazǵan bolatynbyz.