Tramp Qytaıǵa qarsy baj salyǵyn 90 kúnge keıinge qaldyrdy

ASTANA. KAZINFORM – AQSh prezıdenti Donald Tramp Qytaıdan keletin taýarlarǵa baj salyǵyn engizýdi taǵy 90 kúnge shegerdi. Ol tıisti jarlyqqa dúısenbi, 11 tamyzda qol qoıdy, dep habarlaıdy Euronews.

Tramp ony uzartý týraly jarlyqqa burynǵy kelisimniń aıaqtalýyna birneshe saǵat qalǵanda qol qoıdy.

Atap ótilgendeı, bul jarlyq bolmasa, Qytaıdyń AQSh-qa ımportyna salynatyn baj salyǵy 145%-ǵa deıin kóteriletin edi. 

Buǵan deıin QHR Syrtqy ister mınıstrligi Vashıngtonnyń «teńdik, qurmet jáne ózara tıimdilik negizinde» oń nátıjelerge umtylatynyna úmit bildirdi.

Eske sala ketsek, bıylǵy sáýir aıynda Tramp Qytaıdan keletin taýarlarǵa 125% baj salyǵyn engizdi.

Amerıkanyń engizgen salyǵyna jaýap retinde Qytaı 12 sáýirden bastap AQSh taýarlaryna salynatyn baj salyǵyn 84%-dan 125%-ǵa deıin kóterdi. 

Alaıda mamyr aıynyń basynda Beıjiń men Vashıngton kelissóz júrgizý jáne bir-biriniń ustanymdaryn naqtylaý úshin 90 kúndik «bitimge» kelisti. 

Ótken aıda qytaılyq jáne amerıkalyq delegatsııalar Stokgolmde kezdesti, «bitimdi» taǵy úsh aıǵa uzartý týraly sheshim sol jerde qabyldandy dep sanalady.

Amerıkalyq BAQ-tyń habarlaýynsha, Aq úı sheneýnikteri optımıstik kózqarastaryn bildirip, aldaǵy 90 kúnde túpkilikti saýda kelisimi jasalýy múmkin ekenin joqqa shyǵarmaıdy. 

Alaıda Donald Tramp Qytaıdyń áreketin jáne onyń kóshbasshysy Sı Tszınpındi joǵary baǵalaǵanymen, bul máselege qatysty anyq emes sóıledi. 

Buǵan deıin Kazinform agenttiginiń halyqaralyq sholýshysy Tramptyń baj salyǵy jahandyq naryqqa qanshalyqty qaýip tóndiretini týraly jazǵan bolatyn.