Tramp Qytaıǵa Blackwell chıpterin satýǵa qashan ruqsat beretinin aıtty

ASTANA. KAZINFORM — AQSh prezıdenti Donald Tramp aldaǵy eki-úsh jylda Nvidia kompanııasynyń Blackwell chıpteri eń ozyq tehnologııa sanatynan shyqqan kezde, olardy Qytaıǵa satýǵa ruqsat berilýi múmkin ekenin málimdedi, dep habarlady Lianhe Zaobao. 

Tramp dal ıntervıý New York Post
Foto: New York Post

Bloomberg agenttiginiń 19 qarashadaǵy málimetine súıensek, Tramp Qytaıdyń Shenchjen qalasynda ótip jatqan Azııa-Tynyq muhıty ekonomıkalyq yntymaqtastyǵy (APEC) sammıti aıasynda Fox News arnasyna suhbat bergen.

– Eki-úsh jyldan keıin, eger men áli qyzmette bolsam, Blackwell chıpterin satýǵa bolady dep ruqsat berer edim. Sebebi ol ýaqytta kompanııada odan da jańa ónimder paıda bolady, – dedi ol óz sózinde. 

Aıta keteıik, Tramptyń ekinshi prezıdenttik merzimi 2029 jyldyń qańtarynda aıaqtalady.

AQSh prezıdentiniń aıtýynsha, Nvidia qazirdiń ózinde Blackwell-den asyp túsetin jańa býyn chıpterin ázirlep jatyr. Ol Blackwell chıpteri qazir óte ozyq bolǵanymen, taǵy bir jyldan keıin eskirýi múmkin dep esepteıdi.

Blackwell chıpteri – AQSh pen Qytaı arasyndaǵy tehnologııalyq básekeniń basty nysandarynyń biri. Onyń joǵary esepteý qýaty Qytaıǵa jasandy ıntellekt (JI) tehnologııalaryn jedel damytýǵa múmkindik beredi. Buǵan deıin Nvidia AQSh úkimetinen osy chıpti Qytaıǵa satýǵa ruqsat alýǵa tyrysqanymen, Tramp ákimshiligi kelisim bermeı, tek ónimdiligi tómendeý H200 protsessorlaryn eksporttaýǵa ǵana ruqsat etken bolatyn.

Ótken aptada Nvidia-nyń burynǵy bas dırektory Djensen Hýang jeke ómirine qatysty daý-damaıdan soń qyzmetinen ketkennen keıin, kompanııanyń Qytaı naryǵyna degen kózqarasy da ózgerdi.

17 qarashada ótken qarjylyq esep berý jıynynda Nvidia bas dırektorynyń mindetin atqarýshy Kolett Kress kompanııanyń AQSh úkimeti maquldaǵan Hopper serııaly derekter ortalyǵy chıpterin Qytaıǵa jetkizýdi toqtatqanyn jarııalady. Endi bolashaq kiris boljamdaryna da osy ónimderden túsetin tabys engizilmeıdi. Ol ótken toqsanda Qytaıda quny 2,4 mıllıard AQSh dollaryn quraıtyn Hopper ónimderi satylǵanyn aıtqanymen, jetkizilimdi toqtatý sebebin naqtylamady.

Sol kúni Nvidia ulttyq qaýipsizdik jáne eksporttyq baqylaý máselelerimen aınalysatyn dırektorlar keńesiniń arnaıy komıtetin quratynyn málimdedi. Kompanııanyń jańa tóraǵasy Harvı Djons ulttyq qaýipsizdik ahýaly naryqtyq ortany túbegeıli ózgertip jatqanyn atap ótip, kelesi bas dırektor bul máselege asa saqtyqpen qaraýy tıis ekenin eskertti.

Sonymen qatar osy aptada Tramp ákimshiligi qytaılyq kompanııalardyń sheteldik derekter ortalyqtary arqyly ozyq JI chıpteri men serverlerin qashyqtan paıdalanýyn shekteý úshin birqatar elderge chıp eksporttaýdy baqylaýdy kúsheıtti.

Tramptyń sońǵy málimdemesi AQSh Kongresinde ozyq chıpterdiń Qytaıǵa eksportyn shekteıtin zań jobasyn ilgeriletýge qosymsha serpin berýi múmkin. Respýblıkashyl senator Djım Benks pen demokrat senator Elızabet Ýorren Blackwell sekildi ozyq chıpterdi Qytaıǵa satýǵa tyıym salatyn «Jasandy ıntellektti qadaǵalaý týraly zań» (AI Overwatch Act) jobasyn usynyp otyr. Qazirgi ýaqytta bul qujat jyldyq qorǵanys bıýdjeti týraly zań aıasynda sońǵy kelisý kezeńinen ótip jatyr.

Buǵan deıin AQSh Qytaı, Reseı jáne Iran kompanııalarynyń sheteldik derekter ortalyqtary arqyly ozyq jasandy ıntellekt chıpterine qashyqtan qol jetkizýin shekteıtin jańa ereje ázirlep jatqanyn jazdyq.