Tramp Qytaıdan keletin taýarlarǵa 125% baj salyǵyn engizdi

ASTANA. KAZINFORM – Donald Tramp álemniń 75 eline joǵary tarıfterdi engizýdi 90 kúnge toqtatý týraly buıryq berdi, alaıda bul shara Qytaıǵa áser etken joq, dep habarlaıdy Kazinform agenttiginiń menshikti tilshisi. 

- Saýda, saýda kedergileri men tarıfterge qatysty máselelerdi talqylaý úshin 75-ten astam eldiń Qurama Shtat ókilderine, sonyń ishinde Saýda mınıstrligine júgingenin jáne bul elderdiń Qurama Shtattarǵa qarsy eshbir jaýap sharalaryn qoldanbaǵanyn negizge ala otyryp, men 90 kúndik úzilis pen osy kezeńde 10% aıtarlyqtaı tómendetilgen ózara tarıfti dereý qoldanýǵa ruqsat berdim, ol dereý kúshine enedi. Osy máselege nazar aýdarǵanyńyzǵa raqmet! – dep jazdy Donald Tramp Truth Social-da.

Alaıda bul sharanyń Beıjińge qatysy joq.

- Qytaıdyń álemdik naryqqa tanytqan qurmetsizdigin negizge ala otyryp, men Qurama Shtattardyń Qytaıǵa salynatyn baj salyǵyn 125%-ǵa deıin kóterip otyrmyn, ol birden kúshine enedi. Bir sátte, jaqyn bolashaqta Qytaı AQSh pen basqa elderdi tonaý ýaqyty endi turaqty nemese qolaıly emes ekenin túsinedi dep úmittenemin, - dedi AQSh prezıdenti áleýmettik jelide.

Buǵan deıin Qytaı AQSh taýarlaryna 50 paıyz qosymsha baj salyǵyn engizgenin jazǵan bolatynbyz. 

Sondaı-aq Qytaı AQSh tarıfterine baılanysty DSU kóleminde tekserý júrgizilýine bastama kóterdi.