Tramp Qytaı stýdentteriniń AQSh-ta bilim alǵanyn qalaıtynyn aıtty
ASTANA. KAZINFORM — Qytaıda saparmen júrgen AQSh prezıdenti Donald Trump Donald Tramp qytaılyq stýdentterdiń AQSh ýnıversıtetterinde bilim alýyn qoldaıtynyn málimdedi, dep habarlady Lianhe Zaobao.
Fox News telearnasynyń júrgizýshisi Shon Hennıtıge bergen suhbatynda Tramp sheteldik stýdentterdi amerıkalyq oqý oryndaryna qabyldamaý qorlaý sııaqty kórinetinin aıtty.
– Belgili bir elge «biz senderdiń stýdentterińdi ýnıversıtetterimizde kórgimiz kelmeıdi» dep aıtý – óte qorlaıtyn nárse, - dedi ol.
Tramptyń sózinshe, eger qytaılyq stýdentter AQSh-qa oqýǵa kelmese, eń aldymen amerıkalyq orta deńgeıli ýnıversıtetter zardap shegedi.
– Sodan keıin olar Qytaıdyń ózinde jańa ýnıversıtetter asha bastaıdy, - dedi AQSh prezıdenti.
Sońǵy jyldary AQSh-taǵy qytaılyq stýdentter sany azaıyp keledi. Buǵan AQSh-taǵy saıası ahýal, Qytaı stýdentterine qatysty jaǵymsyz kózqarastar, Qytaı ekonomıkasyndaǵy ózgerister jáne jergilikti joǵary oqý oryndarynyń kúsheıýi áser etken.
AQSh Memlekettik departamenti qoldaǵan zertteý nátıjesine sáıkes, ótken oqý jylynda AQSh-ta 265 myńnan astam qytaılyq stýdent bilim alǵan. Alaıda Úndistan Qytaıdy basyp ozyp, sheteldik stýdentter sany boıynsha birinshi orynǵa shyqqan.
Suhbat barysynda júrgizýshi qytaılyq stýdentterdiń zańsyz áreketterge qatysy bolýy múmkin degen máseleni de kóterdi. Buǵan jaýap bergen Tramp:
– Shynyn aıtqanda, olar bizge bir nárse jasady, biz de olarǵa bir nárse jasadyq, - dedi.
Sonymen qatar Tramp bul máselede óziniń keıbir konservatıvti jaqtastarymen pikir qaıshylyǵy bar ekenin jasyrmady.
– Barlyǵy meniń pikirimmen kelise bermeıdi. Bul konservatorlardyń ustanymyna uqsaı bermeýi múmkin. Biraq men ózimdi konservatordan góri, aqylǵa kóbirek súıenetin adam dep esepteımin, - dedi ol.
Aıta keteıik, buǵan deıin AQSh memlekettik hatshysy Marko Rýbıo qytaılyq stýdentterdiń vızalaryn jappaı qaıtaryp alý qajettigin málimdegen bolatyn. Sonymen qatar Tramp ákimshiligi stýdenttik vıza rásimdeý kezinde áleýmettik jelidegi jarııalanymdardy tekserýdi kúsheıtip, keı kezeńderde vıza berýdi ýaqytsha toqtatqan edi.
Buǵan deıin AQSh prezıdenti Donald Tramptyń Qytaıǵa memlekettik sapary barysynda Qytaı tóraǵasy Sı Tszınpınmen kelissózder ótkizip, ony bıyl qyrkúıek aıynda AQSh-qa kelýge shaqyrǵany týraly jazǵanbyz.
